Khu kăn pơkuâ hnê ngăn Đảng ủi kong pơlê Khánh Hoà nếo tơkŭm po roh hôp tơpui tơno pơla Khu kăn pơkuâ hnê ngăn Đảng ủi ƀă mâu kăn ƀô̆, mơngế ngăn cheăng, mơngế pêi cheăng râ cheăm hơnăm 2026. Roh hôp kố hiăng tơdah xo 210 tơdroăng kơ-êng tối dêi kăn ƀô̆, mơngế ngăn cheăng, mơngế pêi cheăng a 64 to cheăm, bêng. Mâu rơkong tơpui mê tơkŭm hên a mâu tơdroăng ki ‘mâi rơnêu tăng rah mơngế pro kăn hnê ngăn, tăng rah mơngế pro kăn ƀô̆, ‘na tơdroăng kâ liăn khế, ‘na ‘mâi rơnêu túa chêh bro hlá mơ-éa, túa ki xúa kơxô̆ tung pêi cheăng ƀă kơxô̆ liăn ki pêi cheăng a cheăm.

Ai hên cheăm, bêng hiăng tối mơnhên hnoăng cheăng pêi lối hơngăm la mâu ngế kăn  ƀô̆, mơngế ngăn cheăng, mơngế pêi cheăng tá hâi tơxâng vâ pêi pro mâu hnoăng cheăng ki iâ mơngế ƀă tơdroăng pâ thế pêi pro tiô hnoăng cheăng tơná. Ai hên bêng ki ai kơdrâm kuăn pơlê, tơnêi tíu kân rơdâ, ivá mơnhông kơphô̆ rế hía rế ó, rĕng, la kơxô̆ mơngế ngăn cheăng, mơngế cheăng tá hâi teăm tơxâng ƀă hnoăng cheăng, ing mê, pro kăn ƀô̆ athế pêi pro hên mâu tơdroăng cheăng ki tá hâi chói ‘nâi la lâi.

Jâ Trường Thị Thu Thảo, Phŏ ngăn ‘na Mơjiâng cheăng Đảng bêng Nam Nha Trang, kong pơlê Khánh Hoà tối ăm ngin ‘nâi, hnoăng cheăng hngăm, athế thâ pêi vâ rĕng kêi, la kơxô̆ liăn khế kâ rế hía rế iâ.

“A bêng ngin kố ai hên mâu vâi pú hiăng pơtê cheăng ƀă pơhlêh tơdroăng cheăng u ê, ing tơdroăng ki hngăm pá puih dêi tơdroăng cheăng ga kân ó khât, tung pơla mê, dế nôkố ôh pa ai tơdroăng ki mơhá tơ’nôm 30% kơxô̆ liăn ăm khu cheăng Đảng. Klêi kơ’nâi hiăng ‘nâi nhên tơdroăng kố châ 6 khế, la nôkố liăn khế xuân hiăng chu kơdroh hên, hnoăng cheăng athế pôu hngăm hên luâ tâ hdrối, mê hên mâu vâi pú hiăng tí tăng pêi mâu tơdroăng cheăng ki ê vâ tơtro ƀă tơdroăng rêh ối, cheăng kâ dêi on veăng, rơpŏng hngêi tơná”.

Dế nô kố, Khánh Hoà ai 4 to bêng ai 100.000 pơ’leăng mâ mơngế ƀă mơjiâng châ lối 10 to cheăm, bêng ki ai pơ’leăng mâ lối 50.000 ngế. Hên cheăm, bêng hiăng pâ thế kong pơlê rĕng tăng mơngế ngăn cheăng, pêi cheăng ki krá tơniăn ton ƀă mâu cheăm, bêng ki ai kơdrâm kuăn pơlê; tơdrêng amê, thâ rĕng pơkâ hnoăng cheăng ƀă tơdroăng tăng rah xo mơngế cheăng vâ kơdroh ki hngăm hngo ƀă pá puât ăm mơngế ki cheăng tung Khu ngăn cheăm, bêng. Pôa Phạm Ngọc Hải, Kăn pơkuâ hnê ngăn Đảng ủi cheăm Tây Khánh Sơn tối ăm ngin ‘nâi, drêng hnoăng cheăng hên, hngăm hngo, mơngế cheăng iâ, mê cheăm kal athế xúa, kơnôm tơngah hên ing kŏng ngê̆ thŏng tin vâ mơdêk ki tơƀrê tơdroăng cheăng. Méluâ ti mê, ki xahpá má môi dế nôkố, mê cho ôh tá hâi ai liăn ngân ki vâ mơ’no liăn cheăng:

“Tâng kăn ƀô̆, mơngế ngăn cheăng, mơngế pêi cheăng ngin xúa mâu phần mềm kui kố ga kô tro khât, ai pơxúa ‘nâng, malối ga kơdroh chôu phut pêi cheăng, tơƀrê tâ tung tơdroăng vâ tối tợbleăng ăm râ pá pêng mâu hnoăng cheăng vâ pêi pro, hnoăng cheăng ki gum ăm kuăn pơlê ƀă khu mơdró kâ kô lĕm tro tơniăn tâ. Ki kal akố, mê cho kơxô̆ liăn ki vâ rôe phần mềm ki păng ‘nâng, ôh tá xê xúa xo xo ki ôh tá trâu hơngế, klêi mê, xing xoăng hnoăng, xing xoăng ki pôu râng cheăng ăm kăn ƀô̆, mơngế ngăn cheăng ing râ kong pơlê troh a râ cheăm vâ ngin châ xúa, pêi pro mâu tơdroăng ki kố”.

Klêi kơ’nâi châ tâng, châ ‘nâi mâu rơkong tơpui tối, kơ-êng dêi kuăn pơlê, mâu kăn a roh hôp, pôa Trần Phong, Kăn pơkuâ hnê ngăn Đảng ủi kong pơlê Khánh Hoà hiăng pơkâ thế mâu khu râ, kơvâ cheăng thâ rĕng lêi tah lôi mâu tơdroăng ki tơvâ tơvân, ki ối kreăng, tâng mê cho hnoăng cheăng tơná chiâng pêi pro, athế rĕng pro hlối, tơdrêng amê, tơveăng tối ăm khu kăn pơkuâ hnê ngăn, ing mê ah, tối tơbleăng ăm Tíu xiâm pơkuâ hnê ngăn Đảng mơnhên ngăn, ƀă ai troăng hơlâ tơveăng gum, lêi tah lôi mâu tơdroăng ki tơvâ tơvân.

“Pâ thế mâu kơ koan, khu râ, mâu kơvâ cheăng thăm mơdêk hnoăng cheăng tơrŭm, hbrâ pêi pro dêi ing ahdrối luâ tâ kơ mê nếo, xing xoăng hnoăng cheăng ăm mâu kăn ƀô̆ lăm troh a tơrêm cheăm bêng, vâ tí tăng hlê plĕng ‘na tơdroăng ki nếo, ki tơdrêng, ki lâi ối tơvâ tơvân, athế rĕng teăm tối pơtâng ăm Khu kăn pơkuâ hnê ngăn Đảng, Vi ƀan hnê ngăn kong pơlê. Tâi tâng to lâi chât rơkong ki tiâ mơnhên kố kal athế vêh séa mơnhên, ‘mâi rơnêu, pơtroh ăm 64 to cheăm, bêng, pơkal athế ai troăng hơlâ ki tiâ mơnhên chiâng lơ ôh” Tâng athế tơkôm mê athế tơkôm kơbố?”.

Mơgêi roh hôp ki tơpui tơno mê, ối ai hên mâu tơdroăng ki ai păng ‘nâng mâu tơdroănug cheăng a cheăm bêng dêi Khánh Hoà hiăng châ mơ’no tối tơdrăng khât, ing lối hngăm hngo pôu râng mâu tơdroăng cheăng, tơdroăng ki ôh tá bê mơngế pêi cheăng, kơdroh liăn khế kâ rêm khế, pá puât ‘na kơxô̆ liăn ki vâ rôe mâu phân mêm ki xúa tung tơdroăng cheăng kơxô̆ chal nếo. Mâu rơkong ki tơpui tối, pâ thế dêi mâu kăn ƀô̆, mơngế ngăn cheăng, mơngế cheăng a 64 to cheăm, bêng ôh tá xê to vâ mơhno tối ki tơchĕng tơmiât tôu tuăn dêi khu kăn ƀô̆ a cheăm bêng mê ối ăm hlo, mê cho tơdroăng cheăng ki athế pêi pro tơdrêng athế rĕng ‘mâi rơnêu túa cheăng, troăng hơlâ ki tơveăng gum ăm i tơtro ƀă ki păng ‘nâng dêi pơ’leăng mâ mơngế, ki rĕng dêi tơdroăng mơjiâng kơphô̆ ƀă ivá cheăng ki hngăm hngo dêi mâu pôu râng hnoăng cheăng dế nôkố. Tơdroăng ki kong pơlê pơkâ thế séa mơnhên ngăn, tiâ mơnhên tung tơrêm tơdroăng cheăng xuân pói rơhêng vâ a la ngiâ kô ah kô châ tơ’lêi hlâu tâ, kô veăng gum lêi tah lôi tơdroăng ki xahpá, ing mê, mơjiâng tơdroăng ki vâ mâu kăn ƀô̆ a cheăm bêng hmiân tuăn pêi cheăng, thăm mơdêk ki tơƀrê tơdroăng cheăng tơveăng gum ăm kuăn pơlê ƀă khu mơdró kâ a lâp lu kong pơlê Khánh Hoà.