A mâu kuâ dêi rông í a thôn Đoàn Kết, cheăm Tân Hội, kong pơlê Lâm Đồng, mâu pul on tơhrik kơtâu ƀă tôu mâ hâi pơtăng dêi rơpó tơdah xo kong tôu. Tung dế, khu í châ păn tiô pơkâ ki ôh tá kơbố châ ngăn; kơtâ í klêi kơ’nâi gô̆m xo, tâ tung kơthung pơrá châ séa ngăn nhên, tí tăng ‘nâi xiâm kối ƀă mah QR.

Kố cho túa pêi “Kơtâ í pơkeăng lĕm” dêi môi ngế mơdró kâ, hlối tơrŭm xúa on tơhrik krúa, kong ngê̆ sinh hok, pơhlêh xúa tung hyôh internet ƀă cheăng kâ tâ tá. On tơhrik kơtâu ƀă tôu mâ hâi kơdroh kơxô̆ liăn hrê; pơkeăng ƀă mâu tơmeăm ki ê ‘na sinh hok châ ‘mot tơ’nôm tung kế kâ; trếo ‘mêi mơno ing păn mơnăn mơnoâ châ mơjiâng pro phon hưh cơ. Pôa Phạm Trọng Tâm, ngế ki mơdró kâ ăm ‘nâi, dế mơjiâng pro túa pơkâ ki pêi cheăng tơdrăng, lĕm ƀă pro chiâng ki kơnía hên tâ:

“Ngin ôh tá xê tê môi pŭm kơtâ í xo xo ôh, mê tê tá tơdroăng ki loi ƀă kong ngê̆, mơdêk ki kơnía dêi kơtâ í, tơniăn ivá ăm kuăn pơlê ƀă mơdêk ki kơnía ‘na liăn ngân”.

Túa cheăng kố a Tân Hội ăm hlo, khoa hok gá pro chiâng tơdroăng ki kơnía drêng klêi kơ’nâi hriăn ngăn châ xúa, tê mơdró pơhlêh ƀă châ kơchơ mơdró hâk vâ. Kố xuân cho tơdroăng Pơkâ kơxô̆ 57 châ pêi pro pơhlêh sap ing mâu tơdroăng ki ai khât a Lâm Đồng drêng pơhlêh sap ing hriăn ngăn krê, ‘ngré chiâng pơkâ mâu tơdroăng rơhêng vâ pơhlêh nhên dêi mâu kế tơmeăm păn roăng, pro. Ƀă pêi chiâk deăng, pakĭng kơpong pêt tơmeăm, mah kơxô̆ kơpong pêt ƀă tíu ki tâ tung kơthung, kong pơlê ối kal pêi pro klêi mâu tơdroăng ki pro hnôu hngíu, logistics, rak, drâ eăng mâ hâi ƀă pêi pro krúa klêi kơ’nâi krí vâ mơdêk ki kơnía dêi tơmeăm.

Tung pơla hơnăm 2026-2027, kong pơlê Lâm Đồng pơkâ pêi kô tŏng gum iâ hlái 20 hnoăng cheăng hriăn ngăn ƀă hnê tối kong ngê̆, 20 khu tơkêa hriăn ngăn, mơjiâng pro, 30 khu mơdró kâ pơhlêh nếo tơmiât pêi rơkê ƀă 300 khu mơdró kŭn ƀă krâ kơvâ tung pơhlêh xúa hyôh internet; tơdrêng amê, hlối mơjiâng 3 túa tơrŭm cheăng tung hriăn ngăn, ứng dụng ƀă tê mơdró xúa kŏng ngê̆.

Vâ mâu tơdroăng pơkâ pêi kố chiâng kơnía khât, mâu tíu ki tơrŭm sap ing kơpong pêt, mơjiâng pro uâ pơliê ƀă kơchơ tê mơdró athế châ tơdjêp. Pôa Nguyễn Ngọc Phúc, Phŏ kăn hnê ngăn Vi ƀan kong pơlê Lâm Đồng, ăm ‘nâi, kong pơlê dế kơjo xúa tuăn ngoâ rơkê kuăn mơngế pro vâ mơdêk ki tơƀrê tung pêt, pêi pro klêi tơdroăng ki kơnía ƀă thăm mơnhông ivá tơxup tơbriât.

“Lâm Đồng ai hên tơdroăng ki rơdêi ‘na pêi chiâk deăng xúa kơmăi kơmok chal nếo, uâ pơliê tơmeăm pêi lo ing chiâk deăng, on tơhrik vêh pro. Tơdroăng ki kal cho athế tơdjêp mâu ivá cheăng chiâng mâu tíu tơrŭm, vâ pêi lo ing tơmeăm nếo, kơmăi kơmok nếo, túa pêi nếo, pro pơxúa mâu tơdroăng ki kơnía khât ăm kuăn pơlê, khu mơdró kâ ƀă cheăng kâ dêi kong pơlê thăm mơnhông tâk péa kơxô̆, mơdêk kơlo kơxô̆ tơxup tơbriât râ kong pơlê”.

Sap ing túa pêi kơtâ í pơkeăng a Tân Hội troh mâu tơdroăng ki pêi pro klêi ki kơnía ƀă pơhlêh xúa internet, Lâm Đồng dế rế hía rế ăm Pơkâ kơxô̆ 57 xúa tung tơdroăng ai khât, pơhlêh pro khoa hok, kong ngê̆ ƀă pơhlêh nếo tơmiât pêi rơkê chiâng ivá mơnhông ăm thăm mơnhông cheăng kâ kong pơlê.