A rôh leh, Đăi tươ̆ng Nguyễn Trọng Nghĩa, Ngế xiâm pơkuâ cheăng kal kí Khu lêng kuăn pơlê Việt Nam, teăng mâ Kăn xiâm pơkuâ hnê ngăn Đảng, Tơnêi têa hiăng diâp inâi Ngế khên tơnôu khu lêng kring vế kuăn pơlê ăm Kơ koan cheăng hnê tối, hnê hriâm. Teăng mâ Khu pơkuâ ngăn Đảng lêng Tơnêi têa, kăn pơkuâ ngăn lêng ƀă Khu xiâm pơkuâ cheăng kal kí, Đăi tươ̆ng Nguyễn Trọng Nghĩa mơnhên, 80 hơnăm hdrối nah, Khu xiâm ngăn cheăng hnê tối, hnê hriâm đi đo kơhnâ rơkê tung hnoăng cheăng tí tăng ‘nâi plĕng tơdroăng cheăng tung la ngiâ ki xiâm dêi kơvâ cheăng ‘na hiâm mơno, ki rơkê plĕng tung tâi tâng khu lêng.

Mâu hơnăm la ngiâ, tơdroăng tung lâp plâi tơnêi, tung kơpong pơtối pơhlêh rĕng, ôh tá tơniăn, Đăi tươ̆ng Nguyễn Trọng Nghĩa tối nhên, mâu khu 'mêi, mâu khu ki tơtrâ pơtối rế hía rế rơkê; mâu tơdroăng nếo ai tung tơdroăng nôkố chiâng tơdjâk dêi tơdroăng ôh tá tro 'na cheăng kâ kơchơ tê mơdró, măng pơlê pơla ƀă mâu tơdroăng gâk kring ôh tá xê tiah hmâ pơkâ thế rế hía rế hên ƀă tơdroăng kal kí, ki rơkê plĕng dêi khu lêng.