Hngêi trung mâm non Krông Bông, cheăm Krông Bông, kong pơlê Dak Lak klêi rah xo bro lế lĕm ai 1 tíu xiâm, 2 phân hiê̆u ƀă 3 tíu hngêi trung ‘ngé ƀă 515 vâi hdrêng. Tơdroăng rak hok tro, thái cô a mâu hngêi trung ki ton kum kơdroh tơdroăng ki ôh tá tơniăn, la xuân pơkâ tơdroăng ki pơkuâ ngăn môi hngêi trung tung môi kơpong kân rơdâ, hok tro utâi utá. Jâ Lê Thị Thuý Nga, Kăn pơkuâ hngêi trung tối ăm 'nâi:

“Hngêi hơpiâp kâ hmê, ối koi pơtê Măng Non cho kum ăm hmê kâ ăm 2 hngêi trung, xua mê cho kô ai tơdroăng ki pơto chơ kế kâ troh a môi tíu hngêi trung ki ê. Phân hiê̆u hngêi trung Họa Mi mê môi toăng hngêi kâ hmê kô kum ăm hnoăng hmê kâ ăm  1  phân hiê̆u ƀă 2 tíu hngêi trung  ‘ngé, xua mê  xuân trâm pá tung tơdroăng ki cho pơto chơ kế kâ ăm hok tro ing kơxô̆ liăn ki pơlê pơla veăng tơlo dêi nôu pâ hok tro."

-Khu pơkuâ 'na mơhno túa lĕm tro

Drêng môi hngêi trung klêi rah xo bro lế lĕm ai hên tíu hngêi trung, tơdroăng kal vâ pơkuâ, tơkŭm po tơdroăng hnê hriâm ôh tá chiâng bu riân tiô troăng pơkâ pêi dêi hngêi trung ki xiâm. A Hngêi trung râ má môi Nguyễn Du, bêng Tân Lập, kong pơlê Dak Lak, tơdroăng ki kal rah xo mơngế pơkuâ hnoăng cheăng Đô̆i a mâu hngêi trung cho môi tơdroăng ki pơtih. Jâ Nguyễn Thị Hương, kăn pơkuâ hngêi trung ăm 'nâi nôkố athế rah xo thái cô pêi hnoăng cheăng tơdjuôm:

“Tơdroăng ki kân má môi dêi mâu hngêi trung nôkố dế kreăng mê cho ôh tá tŭm môi khu pơkuâ chuyên trăch vâ gum ăm tơdroăng pêi cheăng dêi hngêi trung a hên mâu tíu hngêi trung mê pơkâ thế chiâng cheăng, pêi cheăng trâu hơhngế. Nôkố cho mâu hngêi trung hnê hriâm tiô tơdroăng ki chêp utâi utá, mê cho thế xo dêi thái cô môn ki kố lơ thái cô râ má môi vâ pêi. Châ khât vâ ai môi thái cô pơkuâ tâi tâng mê tá hâi ai. Tá thái cô hnê rơhdruê, tơdrá nôkố mê xuân tá hâi tơxâng chiâng pêi tơdroăng ki mê’’.

Klêi kơ'nâi rah xo bro lế lĕm péa râ hriâm râ má môi ƀă râ má péa, Hngêi trung râ má môi - râ má péa Quang Trung, cheăm Krông Bông, kong pơlê Dak Lak ki xiâm tŭm kơbong hriâm ăm 19 lâm la ôh tá tŭm hên kơbong pêi cheăng, kơbong hriâm. Pôa Nguyễn Viết Bá Hoàng, kăn pơkuâ hngêi trung ăm 'nâi, maluâ hngêi trung châ pơcháu tơ'nôm tíu pêi cheăng dêi mâu kơ koan ton vâ po rơdâ tíu pêi cheăng, la ôh tá tơxâng pơkâ.

“Tâi tâng kơbong pêi cheăng dêi Vi ƀan cheăm nôkố ngin bu xúa pro mâu kơbong lơ kơbong chêh pro hlá mơ-éa tê. Tâng ăm kơxô̆ liăn lơ troăng hơlâ tiah lâi vâ ngin tah lôi xo tơvêh tơnêi vâ mơ'no liăn pơtối. Xua nôkố tâng ôh tá ai tơnêi dêi tíu pêi cheăng Vi ƀan cheăm ton mê ngin ôh tá chiâng pêi klâi ôh. Nôkố ngin ôh tá ai môi kơpong hnê hriâm ivá ki lâi krê ôh. ‘’

 Pakĭng mâu tơdroăng ki pêi ton xŏn, tơdroăng ki hơ'lêh nếo ối ai mâu tơdroăng ki tơvâ tơvân tung pơla hdrối kố nah. Mâu hngêi trung thế pro mâu hlá mơ-éa ki tơdjâk troh mah kơxô̆ nâp hnoăng liăn hriâm, mah định danh khu tơrŭm ƀă kơlŏng. Tơdroăng ki hrá pro klêi mâu hlá mơ-éa kố kô tơdjâk tơdrêng troh tơdroăng tê mơdró, liăn ngân ƀă tơdroăng pêi cheăng dêi hngêi trung. Jâ Bùi Lan Anh - Kăn pơkuâ Hngêi trung râ má péa Nguyễn Chí Thanh, bêng Tân Lập tối tơdroăng ki ai khât:

“Hngêi trung á cho Trần Bình Trọng tơ'mot ƀă Nguyễn Chí Thanh chiâng Hngêi trung Nguyễn Chí Thanh. Môi tíu pêi cheăng nếo mơjiâng mê cho athế ai mah kơxô̆ nâp hnoăng liăn mơhá nếo ƀă mah định danh khu tơrŭm nếo. Kŏng an xuân pơkâ thế cho tiah mê, tá péa tíu pêi cheăng ton athế nâp mah kơxô̆ nâp hnoăng liăn mơhá ƀă pro nếo mah định danh nếo mê Kŏng an nếo ăm phêp ngin pro kơtâ hlá mơ-éa nếo. Tiah mê troh lối tơdế khế kố ngin hiăng nâp kơtâ hlá mơ-éa mê, pêi cheăng cho ôh tá ai luât pơkâ ki klâi tung pơla hdrối kố nah”.

Kô chiâng hlo, klêi kơ'nâi xing xoăng mâu tíu hnê hriâm tơdroăng pơkâ mơ'no ăm kơvâ Hnê hriâm ƀă Hnê mơjiâng tuăn ngôa rơkê Dak Lak ôh tá xê to xing xoăng nếo hngêi trung lâm, mê athế riân tro kơxô̆ liăn ăm tơrêm túa hngêi trung, tơrêm kơbong ƀă tíu hnê hriâm; tơdrêng amê hlối tơleăng mâu tơdroăng ki ôh tá tŭm 'na mơngế pêi cheăng, ƀơrô cheăng, tơmeăm ƀă hngêi trăng troăng klông kum tung hnê hriâm. Kơdroh tíu xiâm cho tơdroăng châ tơƀrê dêi tơdroăng xing xoăng. Ki pơxúa khât dêi tơdroăng kố kô châ mơhno a hneăng ki pơtối, drêng mâu hngêi trung nếo pêi cheăng tơniăn, tơdroăng hnê hriâm châ rak tơniăn ƀă hok tro a mâu hngêi trung ki pơrá phá pơrá ai rôh châ achê mâu tơdroăng hnê hriâm tơdâng tơ'mô.