Tung mơ-éa pơchuât a Leh pôu ngăn, mơdâm ƀă ‘mế mâu kơxêng kiâ mố đô̆i, jâ Y Ngọc, phŏ kăn hnê ngăn Vi ƀan kong pơlê Kon Tum, Ngế xiâm khu hnê mơhno 515 kong pơlê, tối rơdêi: Tơdroăng ki hlâ rêh dêi mâu ngoh hiăng gum tơleăng lĕm Kuăn pơlê mâu Khu hdroâng mơngế Lếo a ngiâ, xâ hdi xo tơnêi têa ƀă ‘mâi mơnhông tơnêi têa Kul xua tơdroăng pơkuâ kơdê hlâ mơngế ki rơ-iêo; cho tơdroăng pơxá ăm tơdroăng ki ôh tá chiâng hlâ, đi đo hdró tung hiâm mơno mâu rơxông dêi rêm ngế Việt Nam xuân môi tiah kuăn pơlê 2 tơnêi têa pú Lếo ƀă Kul.

Pêi pro hnoăng cheăng tí tăng, tơkŭm ƀă djâ kơxêng dêi mâu mố đô̆i ki hlâ a Lếo ƀă Kul vêh dêi a pơlê xiâm, 6 khế rơnó tôu hơnăm 2024 – 2025, Đô̆i K53 kong pơlê Kon Tum hiăng tăng hlo 26 kơxêng kiâ mố đô̆i. Tung mê a Lếo 16 to kơxêng (kong pơlê Attapeau 12 to kơxêng, kong pơlê Champasak ai 4 to kơxêng) ƀă a kong pơlê Ratanakri, Kul 10 to kơxêng.