Tơdrốu khế apoăng hơnăm, kơxô̆ liăn nâp ing liăn xúa tơnêi dêi kong pơlê Kon Tum tiô riân châ 90 rơtal liăn, bu châ 22,5% tâng pơchông ƀă tơdroăng tơmiât. Rơtế a mê ƀă kơxô̆ liăn nâp sap ing mâu tơdroăng tơkêa tí tăng tơnêi tiô riân châ 280 rơtal liăn, châ 22,3% tâng vâ pơchông ƀă tơdroăng tơmiât. A rôh tơpui tơno, kăn Hô̆i đong hnê ngăn kong pơlê, Kăn pơkuâ hnê ngăn Đảng pơlê kong kơdrâm Kon Tum Nguyễn Đức Tuy ăm ‘nâi, sap ing nôkố troh mơ’nui hơnăm mơni xuân ối ai tơdroăng ki pơloăng mơnúa, kơxô̆ liăn nâp sap ing liăn ki tê hngêi trăng tơnêi tơníu mơni kô kơdroh.

Pôa Nguyễn Đức Tuy ăm ‘nâi:

“Tung pơla hdrối kố nah, a go pơlê kong kơdrâm ôh tá tơbriât tê tơnêi. Kuăn pơlê hơ’lêh xúa tơnêi xuân trâm xơpá. To lâi hơnăm hdrối nah kuăn pơlê hơ’lêh xúa tơnêi ƀă liăn hơ’lêh xúa tơnêi gá hên kơnâ khât la hơnăm kố hlo gá ối môi tíu. Tơdroăng ki má péa mê cho tơdroăng ki ‘na yă. Yă tê hơnăm nah, hơnăm hdrối nah nếo laga lôi yă kơtăn kố 2 hơnăm hdrối mê ôh tá châ tê. Ôh tá chiâng tê mê tơnêi ối tiah mê, ôh tá ai liăn pêi cheăng bro hngêi trăng, troăng klông mê ôh tá kâi mơdêk cheăng kâ”.           

Tiô Hồ Văn Đà, Ngế xiâm pơkuâ cheăng kâ - Liăn ngân Hô̆i đong hnê ngăn kong pơlê Kon Tum, kơxô̆ liăn nâp sap ing tê hngêi trăng, tơnêi tơníu kơdroh hên môi iâ cho xua kơchơ mơdró dế trâm pá, ki ê nếo cho yă tê tung pơla nôkố a kong pơlê ôh tá ai tơdroăng ki hơ’lêh teăm tơdrêng tiô troăng pơkâ kơdroh dêi kơchơ mơdró. Tơdroăng kố chiâng tơdjâk troh hên hdroh tơbriât tê tơmeăm chiâng trâm pá, ôh tá ai mơngế roê. Pôa Hồ Văn Đà tối ki ai khât a mâu kơpong ki châ tơbriât tê hên hdroh a pơlê kong kơdrâm Kon Tum:

“Nah ngin chêh bro tơdroăng tơkêa dâng 6 rơtuh cho bê kơxô̆ liăn, klêi mê tâk troh 9 rơtuh hlo gá tơtro. Drêng tê tơbriât ngin pơkâ tâk troh 12 rơtuh vâi tơbriât tê troh 17 rơtuh mơ’nui ngin pơkâ 18 rơtuh mê chiâng ôh tá bro ti lâi. Tơmiât cho kơxô̆ liăn hiăng châ xo, kơbố ‘nâi nôkố tơnêi ôh tá tê.

Tung hên hơnăm ôh tá châ mơjiâng bro kơpong kuăn pơlê rêh ối môi tiah tơdroăng ki tơmiât”.

Vâ tŏng kum mâu tơdroăng ki tơvâ tơvân ăm kơchơ tê mơdró hngêi trăng, tơnêi tơníu châ rak vế kơxô̆ liăn nâp, bro ivá ăm mâu kơvâ cheăng ki ai tơdjâk troh, rơkong tơpui tối dêi hên ngế mâu kăn Hô̆i đong hnê ngăn kong pơlê Kon Tum tối tiah kố, kal ‘mâi rơnêu yă ăm tơtro ƀă teăm pêi tiô tơdroăng ki ôh tá tơniăn dêi kơchơ tê mơdró; teăm tơdrêng, môi tuăn tung hnoăng cheăng pơkâ tơdroăng; tŏng kum tơvâ tơvân tung pêi pro luât.

‘Na tơnêi tơníu, tối tơbleăng dêi Vi ƀan hnê ngăn kong pơlê Kon Tum a Hneăng hôp má 5, Hô̆i đong hnê ngăn kong pơlê Kon Tum hneăng 12 ăm hlo, nâp liăn Tơnêi têa 6 khế apoăng hơnăm 2023 dêi kong pơlê tiô riân châ vâ chê 1.840 rơtal liăn, châ vâ chê 41% túa pơkâ ƀă môi tung mâu kơxô̆ liăn nâp ki iâ má môi cho mâu tơdroăng tơkêa tí tăng, tê roê tơnêi.