Mơhé Lâm Đồng pơtối hnê mơhno, mơhnhôk mâu tíu cheăng kơvâ cheăng tung kong pơlê thâ kêi đeăng tơdroăng kơchuâ um vâ mơjiâng pro tơmeăm  kơpong tơring, laga troh nôkố tơdroăng pê pro xuân hrá tâng pơchông ƀă pơkâ. Pơkâ pêi kong pơlê Lâm Đồng rơxông 2021 – 2030, tơmiât pêi troh hơnăm 2050 hiăng châ Hô̆i đong Hô̆i đong mơnhên Tơnêi têa tơbleăng ăm pê pro ƀă dế châ tơkŭm po kêi đeăng kơchuâ um vâ mơjiâng pro tơmeăm khoăng tiô rơkong tơpui mơnhên.

Tung mê, pakĭng tơdroăng kơchuâ um vâ mơjiâng pro tơmeăm pơkâ pêi tơdjuôm pơlê kong kơdrâm Bảo Lộc ƀă kơpong ki achê mê hiăng pêi kêi đeăng tơdroăng mơnhên, kĭ, tâi tâng mâu tơdroăng kơchuâ um vâ mơjiâng pro tơmeăm ki ê pơrá dế hrá tiô pơkâ pêi.

Pôa Lê Quang Trung, Kăn pơkuâ Mơjiâng pro tơmeăm khoăng kong pơlê Lâm Đồng tối ăm ‘nâi, tiô tơdroăng pêi cheăng mê todroăng kơchuâ um vâ mơjiâng pro tơmeăm kơpong tơring tung kong pơlê hiăng tro hrá tâng pơchông ƀă pơkâ pêi. Xiâm kối xua troăng tơmiât pơkâ pêi kơpong tơring dêi mâu kong pơlê ai phá tơ-ê dêi pó, ai tơring mê pơkâ ‘na pơkâ pêi inhên ăm tơdroăng kơchuâ um vâ mơjiâng pro tơmeăm kơpong tơring laga tiô pơkâ mê ôh tá chiâng djâ ‘măn tung tơdroăng ki vâ pêi pro ki nhên. Xua mê, thế mơdoh chôu vêh pro đi đo, ‘mâi rơnêu hên xôh.