A rôh po tơdroăng, kuăn pơlê tơnăng ká xi xŏng châ tơbleăng tối mâu tơdroăng ki xiâm dêi Luât tơnăng ká xi xŏng hơnăm 2017; hnê rak vế mâu kế tơmeăm ki séa ngăn rôh lăm tơnăng, chêh ‘măn mâu tơdroăng ki tơnăng ƀă pêi pro mâu hlá mơ-éa drêng plong tuk tro lo lăm tơnăng, vêh troh a kơno. Khu ki ai tơdjâk troh xuân hnê tối tơdroăng ki hbrâ ví ƀă xâu xía, teăm tŏng gum tơdrêng mâu tơdroăng ki ôh tá tơniăn ƀă tơrŭm tí tăng, tŏng xo mâu ngế hliăng tiâ a têa kơxĭ.

Pôa Đồng Văn Thi, kuăn pơlê tơnăng ká xi xŏng a bêng Phú Thủy ăm ‘nâi, mâu tơdroăng ki rơkê plĕng hiăng gum vâi krâ nhŏng o hlê nhên hnoăng cheăng pôu râng drêng pêi dêi hnoăng cheăng, hmiân tuăn lăm lo tơnăng ká ƀă pêi pro tro tiô luât pơkê.

“Troh a kĭng hiăng ton, mê nôkố nếo lăm troh akố, xuân tâng vâi tối troh IUU kố la rôh ki mê nah tá hâi ‘nâi nhên khât. Nôkố á lăm hôp, á hlê cho athế tơnăng ká xi xŏng tro pơkâ, ôh tá tơnăng ká xi xŏng a mâu kơpong têa kơxĭ Tơnêi têa ôh tá ăm phêp, pro tiah lâi vâ cheăng tơnăng ká xi xŏng tro luât pơkâ”.

Tiô Mố đô̆i gâk tơkăng kong Thanh Hải, rơtế ƀă lăm ngăn a bo cheăng têa kơxĭ ƀă a têa kơxĭ, cheăng hnê tối luât gum kuăn pơlê tơnăng ká hlê nhên hnoăng cheăng ki ôh tá pro xôi kơpong têa kơxĭ kong têa ê, pêi pro tiô pơkâ tung tơnăng ká ƀă rak vế tơniăn ăm kuăn pơlê, plong tuk. Đăi ŭi Tạ Hữu Nghĩa, Phŏ Đô̆i trưởng Mơhnhôk kuăn pơlê, Đông mố đô̆i gâk tơkăng kong Thanh Hải ăm ‘nâi:

“Đông mố đô̆i gâk tơkăng kong Thanh Hải hbrâ rơnáu tơrŭm ƀă mâu khu râ, kơvâ cheăng, khu pú hên ƀă khu ki ai tơdjâk tơbleăng tŭm troăng hơlâ pêi pro, tung mê tơkŭm hnê tối a hô̆i trương ƀă tíu gâk tơkăng kong a mâu kơno ká vâ vâi krâ kuăn pơlê ‘nâi nhên mâu tơdroăng pơkâ dêi luât. Tơdrêng amê, tíu pêi cheăng xuân tŏng gum tơdroăng ki kal ‘na hnê tối luât tung mâu rôh hôp kuăn pơlê tơnăng ká vâ kuăn pơlê hlê pêi pro tro mâu pơkâ tung pơla tơnăng ká xi xŏng a têa kơxĭ”.

Tung la ngiâ ah, Mố đô̆i gâk tơkăng kong dêi kong pơlê Lâm Đồng pơtối tơrŭm ƀă mâu kơvâ cheăng, cheăm bêng mơdêk rơdêi tơdroăng ki tối tơbleăng luât a kơpong kĭng têa kơxĭ, veăng gum hnê cheăng pêi tơnăng ká xi xŏng pôu râng dêi hnoăng, mơnhông krá tơniăn ƀă pêi pro tơƀrê mâu tơdroăng pâ thế dêi Vi ƀan châu Âu ‘na hbrâ mơdât tơnăng ká xi xŏng tiô pơkâ IUU.