Hneăng lăm pôu ai pơxúa kân khât drêng po klăng rôh tơbâ 50 hơnăm mơjiâng tơrŭm tơpui kâ pơla Việt Nam - Siam, veăng ‘no hnoăng mơdêk tơrŭm cheăng kâ tŭm tơdroăng pơla Việt Nam - Siam rế mơnhông tơƀrê plĕng trâu, ki khât ƀă pơxúa. Péa ngế kăn vâ môi tuăn pơtối mơdêk loi nhoăm kal kí ing tơdroăng pơtối trâm mâ tơrá mâu kăn xiâm ƀă rêm râ; pơtối pêi cheăng tơƀrê mâu luât pơkâ tơrŭm cheăng ki kal, malối luât pơkâ hôp Chin phuh tơdjuôm xua Ngế pro xiâm hnê ngăn péa tơnêi têa rơtế pơkuâ; tơrŭm tơbleăng pêi tơbrê Tơdroăng pêi pro tơbleăng tơrŭm cheăng tung tŭm tơdroăng Việt Nam - Siam pơla hơnăm 2026-2031 ƀă mâu tơdroăng hiăng pêi pro nhên tung mâu kơvâ cheăng lêng, kring tơniăn, cheăng kâ, khoa hok, kŏng ngê̆, túa lĕm tro, ôm hyô ƀă trâm tơpui tơno ƀă kuăn pơlê.

Péa Ngế pro xiâm vâ môi tuăn mơdêk tơbleăng pêi tơdroăng “Pái tơdjêp”, mơdêk tơrŭm mung tê rôe tơmeăm, khu mơdró, kong pơlê ƀă mâu troăng hơlâ mơnhông krá kak; tơbleăng pêi tơbrê Hang lơng cheăng kâ Peăng mâ hâi Lo - Peăng mâ hâi Lâ ƀă Hang lơng cheăng kâ Peăng Hdroh; po rơdâ tơdjêp troăng prôk a ‘nâi, troăng tơƀai ƀă troăng têa kơxĭ; mơhnhôk khu mơdró péa tơnêi têa po rơdâ ‘no liăn pêi cheăng; pơtối rak ki tơbrê luât pơkâ Vi ƀan tơrŭm Tê mơdró Việt Nam - Siam, mơ-eăm rĕng pêi châ tiô pơkâ tê mơdró péa pâ 25 USD, tung la ngiâ kô pêi châ 50 rơtal USD tiô troăng tơdâng tơ’mô ƀă krá ton.