Kơxê lơ 12/7, pôa Phạm Minh Chính, Ngế pro xiâm hnê ngăn Chin phuh, Kăn hnê ngăn Vi ƀan Tơnêi têa ‘na hơ’lêh kơxô̆ pơkuâ po Rôh hôp má 6 dêi Vi ƀan ƀă Rôh hôp mơgêi 6 khế apoăng hơnăm ƀă tơbleăng hnoăng cheăng 6 khế mơ’nui hơnăm 2023 ‘na hơ’lêh kơxô̆ tơnêi têa ƀă Tơdroăng pơkâ mơnhông mơdêk xúa mâu kế tơmeăm vâ rak vế mâu tơdroăng kal ‘na kuăn pơlê rêh ối, kơxô̆ inâi ƀă mơnhên điê̆n tưh kum ăm tơdroăng ki hơ’lêh kơxô̆ tơnêi têa pơla hơnăm 2022 – 2035, troăng ngăn troh hơnăm 2030 (Tơdroăng pơkâ tung hlá mơ-éa 06) dêi Chin phuh.

Tung la ngiâ ah, Ngế pro xiâm hnê ngăn tơnêi têa pơkâ thế, hơ’lêh kơxô̆ tơnêi têa athế tơbleăng tâi tâng, tŭm la athế kơjo ‘na tơdroăng ki rơkê tâ ‘na kơxô̆ ngế; kơjo mơnhông mâu tơdroăng kal malối cho mâu tíu ki ‘măn rak mâu tơdroăng kal dêi tơnêi têa; kơjo kum rak vế tơniăn tung măng, tơniăn tơdroăng kal. Ngế pro xiâm hnê ngăn tối rơdêi, mơjiâng, mơnhông ‘na tơdroăng kuăn pơlê kơxô̆ athế cho môi tơdroăng ki kal dêi hơ’lêh kơxô̆ tơnêi têa, môi tơdroăng ki ôh tá chiâng klâ tung tơdroăng rêh ối cheăng kâ, pơlê pơla.

Ngế pro xiâm hnê ngăn tơnêi têa tối nhên, athế tơrŭm ƀă tơdroăng ki pơxúa pơla Tơnêi têa, kuăn pơlê; la athế tơbleăng tiô túa ki rơkê, tơtro hiâm tuăn kuăn pơlê vâ kuăn pơlê ƀă khu mơdró kâ môi tuăn, veăng tơƀrê.