Jâ Trương Thị Mai, Ngế xiâm pơkuâ cheăng Đảng, Ngế pơkuâ khu tơkŭm cheăng Tíu xiâm hiăng ai rôh trâm pôa Hagiuda Koichi, Kăn Kuô̆k hô̆i râ má péa, Ngế pơkuâ tí tăng ‘nâi plĕng ‘na luât ƀă Khu kăn dêi Đảng Dân chủ Tự do Nhuk (LDP) dế pôu pêi cheăng a Việt Nam. A rôh trâm mâ, péa pâ vâ môi tuăn khĕn kơdeăn khât tơdroăng mơnhông mơdêk ki lĕm tơrŭm cheăng pơla Việt Nam - Nhuk, tung mê, ai tơrŭm cheăng pơla Đảng Kŏng sản Việt Nam ƀă Đảng LDP, tơpui ‘na mơnhông tơrŭm cheăng péa tơnêi têa tung la ngiâ. 

Jâ Trương Thị Mai pơkâ thế Nhuk rơtế ‘mâi mơnhông tơrŭm cheăng pơla péa Đảng tung tơrŭm cheăng pơla péa tơnêi têa, mơdêk tơpui tơno, tơrŭm cheăng ai pơxúa tung mâu kơvâ cheăng, pơtối tŏng kum ODA tơtro ƀă tơdroăng kal vâ mơnhông mơdêk dêi Việt Nam; Tơrŭm a mâu rôh po hneăng hôp tơpui hên tơdroăng ƀă Nhuk vâ kum Việt Nam pơtối rak tơniăn ƀă tơrŭm a Biển Đông tiô tơdroăng Tơhrâ dêi Khu lâp kong têa ‘na Luât têa kơxĭ hơnăm 1982. Peăng Nhuk tối, Nhuk đi đo nhoăm Việt Nam tung luât pơkâ tŏng kum ƀă kơpong.