Veăng hôp a hneăng hôp ai 793 ngế păng ‘nâng cho mâu vâi kơdrâi ki kơhnâ rơkê, teăng mâ ăm mâu vâi kơdrâi, mâu hdrông kuăn ngo, tơdroăng khôp, kơvâ cheăng pêi cheăng ƀă mâu ngế tung pơlê pơla tung lâp tơnêi têa. Hneăng hôp rôh kố mơnhên tối tơdroăng ki vâi kơdrâi ƀă tơdroăng cheăng Hô̆i pơla hơnăm 2022 – 2026, mơ’no túa pơkâ pêi, hnoăng cheăng ƀă troăng hơlâ pêi cheăng Hô̆i, tơdroăng tơ’noăng Khu pơkuâ ngăn tíu xiâm Hô̆i ngăn vâi kơdrâi Việt Nam hneăng XIV, pơla hơnăm  2026 – 2031.

Klêi mê, hneăng hôp tơkŭm tơpui ‘na mâu tơdroăng kal tơbleăng pêi tung hneăng la ngiâ, mê cho: Pơtối pơhlêh nếo tơdroăng kal, túa pêi cheăng dêi Hô̆i; Kơhnâ veăng mơjiâng Đảng ƀă khu cheăng kal kí krúa, rơdêi; Mơjiâng mâu vâi kơdrâi Việt Nam rơkê plĕng, mơnhông túa lĕm tro ƀă kuăn mơngế Việt Nam; Hnoăng cheăng dêi vâi kơdrâi tung mơnhông cheăng kâ, veăng gum pêi pro pơkâ thăm mơnhông rĕng, krá ton dêi tơnêi têa; Tơbêng ki kơnía rơpŏng Việt Nam “rơkê – hơtô - hơniâp”.