Tơrŭm cheăng kal kí tơniăn lĕm pơla péa tơnêi têa châ hdró ing mâu rôh lăm pôu khu râ kăn xiâm. Malối, khế 10/2024, pôa Tô Lâm, Kăn xiâm pơkuâ hnê ngăn cheăng Đảng, pôu păng ‘nâng kong têa Pơhlăng ƀă péa tơnêi têa mơ’no tối rơkong tơbleăng tơdjuôm ‘na mơdêk râ tơrŭm cheăng Việt Nam – Pơhlăng tâk troh kong têa tơrŭm cheăng tung la ngiâ Tŭm têk.

Tiah mê, Pơhlăng chiâng kong têa ki apoăng ối tung Khu tơrŭm châu Âu ai tơrŭm cheăng a kơlo ki kân má môi ƀă Việt Nam. Tơdroăng ki kăn xiâm pơkuâ kong têa Pơhlăng rah xo Việt Nam pro tíu troh apoăng tung rôh lăm pôu kơpong dêi tơná mơhno nhên tơdroăng kơjo tung tơdroăng cheăng la ngiâ ƀă ki kal ó khât ki Pơhlăng ăm tơrŭm cheăng pơla péa tơnêi têa ƀă Việt Nam.

Klêi kơ’nâi leh tơdah păng ‘nâng, pôa Lương Cường, kăn xiâm hnê ngăn tơnêi têa ƀă pôa Emmanuel Macron, kăn xiâm pơkuâ kong têa Pơhlăng rơtế pơkuâ djâ khu kăn xiâm péa tơnêi têa hôp tơpui tơno mâu troăng hơlâ veăng gum pro trâu hơngế, tơƀrê tâ nếo tơrŭm cheăng tung la ngiâ tŭm têk pơla péa tơnêi têa.