Tối mơgêi rôh hôp, pôa Phạm Minh Chính, Ngế pro xiâm hnê ngăn tơnêi têa pơkâ thế tơkŭm po rôh tăng ngăn tơplâ, tăng rup, mơdât, tah mâu ki tê mơdró liu, ôh tá tơdrăng tung mơdró kâ, pêi pro tê tơmeăm ki ôh tá xê khât, tơmeăm ôh tá ‘nâi xiâm mơjiâng pro, pro xôi tơdroăng xúa tuăn ngôa rơkê po sap hâi lơ 15/5 troh hâi lơ 15/6.

Ngế pro xiâm hnê ngăn tơnêi têa pơkâ thế Khu xiâm ngăn cheăng pêi tăng ngăn hnoăng cheăng, tơdroăng cheăng pêi dêi mâu khu xiâm kơvâ cheăng ôh tá lôi ‘’tê kơtê ‘na luât” tung pơla rah pro rế lĕm mơngế pêi cheăng ăm tơnêi têa troh tơdroăng tơngôu tung rak ngăn tơdjâk troh plâ mơdât mâu ki ai xôi, tơdjâk troh tê mơdró liu, tơmeăm ôh tá xê khât, tơmeăm bu bối, ôh tá tơdrăng tung tê mơdró. Khu xiâm kŏng an hnê mơhno mâu lêng pêi cheăng, kong an mâu kong pơlê mơnhên tơdroăng, mơdêk rĕng tơdroăng tăng ngăn tơleăng phâk teăm tơdrêng, teăm tơbleăng mâu tơdroăng tung hlá tơbeăng, rơ’jíu um tơvi vâ teăm pơxâu, hnê hbrâ mơdât.