Pôa Phạm Minh Chính, Ngế pro xiâm hnê ngăn tơnêi têa koh hâk tơpui ƀă pôa Shiota Koichi, kăn hnê ngăn kong pơlê Kagoshima dêi Nhuk dế pôu pêi cheăng a Việt Nam klăng rôh péa tơnêi têa dế tơbâ 50 hơnăm tơrŭm tơpui kâ pơla Việt Nam -Nhuk.

Tiô Ngế pro xiâm hnê ngăn tơnêi têa, tơrŭm cheăng trâu rơdâ pơla Việt Nam - Nhuk dế a rôh mơnhông mơdêk. Nhuk pơtối cho kong têa tơrŭm cheăng kâ ki kal má môi dêi Việt Nam, cho kong têa tŏng kum ODA ki hên má môi, khu ‘no liăn cheăng pro tơmeăm khoăng ƀă cho kong têa tơrŭm ôm hyô má pái, kong têa tơrŭm tê mơdró má pŭn dêi Việt Nam.

Ngế pro xiâm hnê ngăn tơnêi têa tối pơla kong pơlê Kagoshima ƀă mâu kong pơlê dêi Việt Nam ai hên tơmeăm khoăng rơdêi kô tơ’nôm ăm dêi rơpó, tơmeăm khoăng tơrŭm cheăng ối hên. Ngế pro xiâm hnê ngăn tơnêi têa pâ thế Ngế xiâm pơkuâ  kong pơlê ƀă mâu kăn kong pơlê Kagoshima mơhnhôk mâu khu mơdró dêi kong pơlê ‘no liăn cheăng hên tâ a Việt Nam tung mâu kơvâ cheăng ki rơdêi môi tiah pro ô tô, tơmeăm điê̆n tưh ki chiâng hrik, ‘na pêi chiâk, uâ pơliê pro tơmeăm pêi lo ing chiâk deăng ƀă kơmăi kơmok ki kơjo kum.