Kơxê hâi lơ 13/7, pôa Phạm Minh Chính, Ngế pro xiâm hnê ngăn tơnêi têa tơdah pôa Jim Pillen, kăn kong pơlê kân Nebraska dế pôu pêi cheăng a Việt Nam. Ngế pro xiâm hnê ngăn tơnêi têa khĕn kơdeăn kong pơlê kân Nebraska hiăng tơmâng khât troh mơdêk tâ nếo tơrŭm cheăng ƀă Việt Nam. Vâ pêi trâu rơdâ tâ nếo tơrŭm cheăng pơla Việt Nam ƀă kong pơlê kân Nebraska, Ngế pro xiâm hnê ngăn tơnêi têa pơkâ thế kăn hnê ngăn ƀă mâu kơ koan dêi kong pơlê kân Nebraska mơdêk tơpui tơno ƀă mâu kăn ƀă mâu kong pơlê dêi Việt Nam pêi tro tâ nếo hnoăng cheăng cho tíu tơdjêp tung tơrŭm cheăng dêi Việt Nam - Mih.

Ngế pro xiâm hnê ngăn tơnêi têa, pơkâ thế tung la ngiâ, kong pơlê kân pơtối hnê tối mơnhông ƀă Việt Nam, péa pâ mơdêk tơrŭm cheăng kâ, tê mơdró, ‘no liăn cheăng, malối tê ăm dêi rơpó tơmeăm pê lo ing chiâk deăng ká xi xŏng ki pêi lo hên; mơdêk tâ nếo tơrŭm tung tŭm tơdroăng pơrá phá ki péa pâ pêi lo, mê cho hnê hriâm - hnê mơjiâng tuăn ngôa rơkê, khoa hok kơmăi kơmok, hơ’lêh hriăn plĕng ki nếo, cheăng kơmăi kơmok dâi lĕm, liăn ngân, hbrâ ví hyôh kong prâi hơ’lêh. Péa pâ môi tuăn hên tơdroăng tơrŭm ƀă ki kal mơdêk tơrŭm pơla kong pơlê kân Nebraska ƀă Việt Nam tối tơdjuôm, ƀă mâu kong pơlê dêi Việt Nam tối krê.