Ngế pro xiâm hnê ngăn tơnêi têa hâk mơnê Ngế xiâm pơkuâ  cheăng kâ rơtế ƀă 19 khu mơdró ki kân dêi UAE tung mâu kơvâ cheăng mê cho logistics, on tơhrik, meăm, ‘na chiâ xo tơmeăm tung kơdâm tơnêi, kế kâ, liăn  kơdĭng ‘no pêi cheăng, liăn ngân, hngêi rak liăn ƀă hên tơdroăng cheăng ki ê... lăm  pôu Việt Nam. Kố cho rôh ki tro vâ  khu mơdró péa pâ tăng rôh tơrŭm tơ’lêi hlâu mâu kơvâ cheăng ki péa pâ rơhêng vâ ‘nâi plĕng.

Ngế pro xiâm hnê ngăn tơnêi têa khĕn kơdeăn mâu hnoăng veăng ‘no ƀă mâu tơdroăng  vâ pêi ki péa pâ hiăng pêi châ tơƀrê tung rôh tơpui tơno Kĭ tơhrâ tơrŭm cheăng tung tŭm tơdroăng  pơla Việt Nam ƀă UAE. Vâ mơdêk tâ nếo tơrŭm cheăng péa pâ, Ngế pro xiâm hnê ngăn tơnêi têa pơkâ péa pâ mơdêk tơrŭm tơpui tung tâi tâng rêm râ, malối cho mâu kăn xiâm, vâ tơ’lêi hlâu, mơhnhôk mâu khu mơdró péa tơnêi têa tơrŭm ƀă ‘no liăn cheăng; tăng ‘nâi plĕng, tăng ngăn, kơdroh pro hnoăng mơhá ƀă mâu tơmeăm vâ pơtối rak ki rơdêi kô chiâng tơ’nôm ăm dêi rơpó dêi péa tơdroăng cheăng kâ; rĕng pơ’lêh tơdroăng pơkâ mơnhông tê mơdró péa poâ châ 10 rơtal dollars.