Kơxo lơ 27/8, Hô̆i đong Kuăn pơlê kong pơlê Gia Lai hneăng má XII, hneăng hơnăm 2021 – 2026 hiăng tơkŭm po Hneăng hôp má 21 vâ pêi pro tŭm tơdroăng rah xo Kăn hnê ngăn Vi ƀan kong pơlê. A Hneăng hôp, pôa Hồ Văn Niên – Kăn cheăng tung Khu xiâm Đảng, Kăn pơkuâ hnê ngăn cheăng Đảng, Kăn hnê ngăn Hô̆i đong kong pơlê Gia Lai, teăng mâ Khu hnê mơhno má môi Hô̆i đong kong pơlê, hiăng tơbleăng Mơ-éa tơbleăng mâu ngế châ rah xo pro Kăn hnê ngăn Vi ƀan kong pơlê Gia Lai hneăng má XII, hneăng hơnăm 2021 – 2026.

Pơtối mê, pôa Rah Lan Chung – Kăn phŏ pơkuâ hnê ngăn cheăng Đảng kong pơlê Gia Lai hneăng hơnăm 2020 – 2025, teăng mâ Hô̆i đong kong pơlê, châ tơbleăng vâ rah xo Kăn hnê ngăn Vi ƀan kong pơlê Gia Lai hneăng hơnăm 2021 – 2026. Kơ’nâi mê, pôa Rah Lan Chung hiăng châ mâu kăn teăng mâ Hô̆i đong kong pơlê loi tơngah rah xo pro Kăn hnê ngăn Vi ƀan kong pơlê Gia Lai ƀă 100% phĭu rah xo.