Tiô rơkong krếo thế dêi pôa Tô Lâm, Kăn xiâm pơkuâ hnê ngăn Đảng Kŏng san Việt Nam, pôa Lương Cường, Kăn xiâm hnê ngăn tơnêi têa, hâi lơ 14/4, pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ pơxiâm roh lăm pôu pêi cheăng râ tơnêi têa troh tơnêi têa pin tung 2 hâi vâ pơtối pro krá tơniăn tơdroăng tơrŭm nhŏng o tiô khôi vâi krâ nah ‘’hlối cho khu pú, hlối cho nhŏng o “Sinuâ – Việt Nam ƀă thăm loi tơngah troăng pêi cheăng ton xŏn pơla dêi pó, pro trâu hơngế tơrŭm cheăng păng ‘nâng, mơdêk mơjiâng pơlê pơla tối ăm dêi pó tơdroăng la ngiâ Việt Nam – Sinuâ prôk trâu hơngế, păng ‘nâng. Kố cho roh lăm pôu kong têa ê apoăng tung hơnăm 2025, roh lăm pôu Việt Nam roh má pŭn dêi pôa Tập Cận Bình, drêng pôu râng hnoăng Kăn xiâm ki kân má môi dêi Sinuâ ƀă cho roh má péa tung rơtế môi hneăng.

Pôa Bùi Thanh Sơn, Phŏ Ngế pro xiâm, Ngế xiâm tơpui kâ tối ăm ‘nâi, tiô tối hdrối tung roh lăm pôu pêi cheăng, pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ ai mâu roh tơpui tơno râ kăn xiâm ƀă pôa Tô Lâm, pôa Lương Cường, pơtối ai mâu roh trâm mâ tơpui tơno ƀă pôa Phạm Minh Chính, Ngế pro xiâm hnê ngăn tơnêi têa, pôa Trần Thanh Mẫn, Kăn xiâm hnê ngăn Kuô̆k hô̆i vâ tơpui tơno mâu troăng pêi kân vâ mơdêk tơrŭm cheăng pơla péa tơnêi têa tung mâu kơvâ cheăng.