Mơnhên tối khât tơdroăng ki hbrâ rơnáu dêi mâu kong pơlê tung hbrâ rơnáu mâu kế tơmeăm xúa tung hriâm tâp, hngêi trung lâm hriâm, mâu thái cô vâ hnê, hlá mơ-éa hriâm ƀă troăng hơlâ tŏng gum ăm ngế ki hriâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa tối tiah kố hơnăm hriâm nếo kô cho tơdroăng ki mơnúa apoăng ƀă ivá tơbleăng pêi Pơkâ 71 dêi Khu xiâm cheăng kal kí.

Ngế ối a ko Đảng, Tơnêi têa pơkâ thế mâu kong pơlê rak vế tơniăn tŭm hngêi, lâm hriâm, thái cô hnê, hlá mơ-éa hriâm ƀă kế tơmeăm xúa tung hnê ƀă hriâm; pêi pro hiâm mơno “tíu lâi ai hok tro, tíu mê ai thái cô”, oh tá ăm hok tro ki lâi pơtê hriâm xua tơdroăng rêh ối pá puât. Tơdrêng amê, kơvâ cheăng hnê hriâm kal pơhlêh mơdêi sap ing túa tơmiât chiâng pơkuâ ngăn, hbrâ rơnáu hnê mâu ngế cheăng rơkê ăm kơvâ khoa hok kong ngê̆, pơhlêh nếo tơmiât pêi rơkê ƀă mâu kơvâ cheăng tung la ngiâ dêi tơnêi têa.