Tung tối tơbleăng ƀă ăm rơkong tơpui a rôh pêi cheăng, tơpui mơgêi, pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa tối nhên túa tơmiât, tơdroăng cheăng hriăn plĕng khoa hok athế châ pơhlêh nếo rơdêi tá ki hlê plĕng, troăng hơlâ pơkâ, troăng hơlâ ‘no liăn pro, tơkŭm pêi pro ƀă túa ki xúa vâ pêi châ tơdroăng púi vâ mơnhông tơnêi têa tung hneăng ki nếo.

Tối troh mâu tơdroăng kal pêi tơdrêng, pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa pơcháu Đảng ủi Chin phuh pơkuâ, hnê mơhno, tơkŭm pêi pro 9 tơdroăng cheăng, malối cho rĕng chêh pro tơdroăng cheăng tung la ngiâ tơnêi têa ‘na mơjiâng hriăn ngăn khoa hok troh hơnăm 2045. Tơdroăng cheăng tung la ngiâ athế tối nhên tíu ối, túa pơkâ, kơvâ cheăng ki kơjo, liăn ngân, tơdroăng ki pơkuâ, liăn ngân, troăng hơlâ tŏng gum mơnhên tối ƀă troăng pêi pro; pôi tá pêi hên, rah xo tro tơdroăng ki kal, ‘no liăn pro tŭm khế hơnăm, tro ƀă pơkâ pêi mơnhông rĕng, krá ton ƀă pơkuâ xêh tơdroăng cheăng tung la ngiâ.