Tơpui mơgêi rôh hôp, pôa Tô Lâm, Kăn xiâm pơkuâ hnê ngăn cheăng Đảng tối rơdêi klêi kơ’nâi pêi pro Pơkâ 66 tung pơla hdrối hiăng pro hlo pơhlêh nhên khât ƀă hên tơdroăng ki mơnhông tung hnoăng cheăng mơjiâng, chêh pro klêi troăng hơlâ, luât, pêi châ tiô tơdroăng púi vâ mơnhông tơnêi têa.

Kăn xiâm pơkuâ hnê ngăn cheăng Đảng pơkâ thế, Đảng ủi Kuô̆k hô̆i, Đảng ủi Chin phuh, mâu khu râ, kơvâ cheăng a Tơnêi têa ƀă kong pơlê pơtối pêi pro kơtăng, pêi pro tŭm tơdroăng pơkâ pêi, hnoăng cheăng hiăng mơ’no tung pơkâ. Tối nhên, hơnăm 2026 cho hơnăm ki kal khât-hơnăm apoăng tơbleăng pêi tơdroăng Pơkâ Hneăng hôp Đảng rôh má XIV ƀă tơdroăng ki vâ ăm tơdroăng pơkâ mot tung tơdroăng rêh ối, ôh tá chiâng hrá, Kăn xiâm pơkuâ hnê ngăn cheăng Đảng pơkâ thế, tơkŭm 3 tơdroăng, mê cho séa ngăn troăng hơlâ pơhlêh tung mâu túa pơkâ, troăng hơlâ pơkâ ki kân tung mơéa Hneăng hôp XIV;

rĕng chêh pro klêi mâu mơéa vâ tơbleăng 51 luât ƀă 8 tơdroăng pơkâ nếo châ Hneăng hôp rôh má 10, Kuô̆k hô̆i hneăng XV tơbleăng, ôh tá chiâng hrá mâu mơéa hnê mơhno ƀă mâu tơdroăng vâ pêi pro ƀă tơkŭm lêi tah rĕng má môi mâu tơdroăng xơpá, tơvâ ‘na luât, pôi tá tro mơdât tơdroăng mơnhông; pơkâ tơleăng 317 tơdroăng tối tơbleăng, pâ thế ai xơpá, tơvâ tung hơnăm 2026 tiô túa pơkâ, troăng prôk hiăng châ mơnhênl hbrâ rơnáu pơkâ tơleăng mâu rơkong pâ thế, tơbleăng tối nếo tung tơdroăng ki nếo ai sap ing tơdroăng ki ai khât.