Tiô rơkong krếo thế dêi Ngế pôu râng tâi tâng hnoăng kong têa Australia ƀă jâ Cindy Kiro, Ngế pôu râng tâi tâng hnoăng kong têa New Zealand, sap hâi lơ 9 troh lơ 14/8/2026, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa rơtế ƀă Khu kăn xiâm Việt Nam lăm pôu râ Tơnêi têa troh Australia ƀă New Zealand. Kố cho roh lăm pôu apoăng dêi pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa troh péa tơnêi têa drêng to pro kăn xiâm, xuân cho roh lăm pôu apoăng dêi kăn pơkuâ xiâm tơnêi têa pin klêi kơ'nâi Việt Nam mơdêk tơrŭm cheăng to Khu tơrŭm cheăng ton xŏn ƀă Australia ƀă New Zealand.

Rôh lăm pôu vâ pêi pro nhên troăng hơlâ tơpui kâ dêi Hneăng hôp kân Đảng lâp tơnêi têa rôh má XIV, veăng 'no hnoăng djâ tơrŭm cheăng ƀă mâu kong têa tơrŭm cheăng trâu hơngế, păng 'nâng ƀă krá tơniăn. Ki xiâm hneăng lăm pôu vâ mơdêk loi tơngah kal kí a khu râ kăn xiâm, pro ivá nếo tơbleăng tơrŭm cheăng tung la ngiâ Tơrŭm cheăng ton xŏn Tâi tâng ƀă pơkâ mâu tơdroăng ki kal tơrŭm cheăng tung la ngiâ. Tơdrêng amê, kố xuân cho rôh vâ khu râ kăn pơkuâ rêm pâ tơpui tơno 'na mâu tơdroăng kơpong, lâp plâi tơnêi rơtế rơhêng vâ 'nâi plĕng; thăm tơrŭm cheăng a mâu troăng hơlâ hên pâ, veăng 'no hnoăng ăm hơniâp lĕm, tơniăn ƀă mơnhông krá tơniăn a kơpong Nam Thái Bình Dương xuân môi tiah lâp plâi tơnêi.