Tơbleăng a rôh pêi cheăng, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pâ thế Đảng ủi pơkuâ ƀă tâi tâng kăn ƀô̆, mâu lêng Sư đoân ƀô̆ binh kơ yơ̆i 308 thế mơjiâng Sư đoân krá rơdêi ‘na cheăng Kal kí, môi tuăn ƀă Đảng, Tơnêi têa ƀă Kuăn pơlê. Kố cho tơdroăng ki thế pêi pro tro luât, cho xiâm ki pro chiâng rơdêi tung hneăng tơplâ dêi mâu lêng pin.  

Xua mê, Sư đoân thế tơmâng khât hnê mơhno tơdroăng cheăng Kal kí, pơkuâ hnê ‘na tuăn mơno, hnê rak vế pêi pro tơdroăng lĕm ton nah; pro ăm kăn ƀô̆, mâu lêng chôu pâ, rak vế tung tuăn ngôa, ai hiâm mơno lĕm, pêi cheăng tro luât, pêi cheăng tiô ƀối túa Pôa Hồ hnê djâ, hâk tơngăm tơdroăng lĕm tro ton nah, pơtối rak vế hnoăng pôu râng, đi đo rak tuăn chân tơnôu kal kí krá kak, ai tuăn loi khât a hnoăng pơkuâ hnê dêi Đảng, ai tuăn mơ-eăm tung tơplâ, vâ xo hnơng ƀă pê klêi dêi hnoăng cheăng pơcháu drêng ai tơdroăng kal.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa loi khât, ƀă tơdroăng hmâ pêi pro ing rơxông hdrối mê hía nah “Djâ troăng ahdrối, khên tơnôu, tơrŭm môi tuăn, pêi pro tro luât, pêi rĕng, pêi pro khŏm kâi ƀlêi, ƀă hiâm mơno hâk tơngăm dêi tíu pêi cheăng khên tơnôu mâu lêng tơplâ dêi kuăn pơlê, ki hiăng hlê plĕng tơdroăng ton nah, kăn ƀô̆, mâu lêng Sư đoân ƀô̆ binh kơ yơ̆i 308 kô pơtối tơrŭm dêi rơpó, pơ‘lêh nếo, hriăn cheăng ki nếo, ing ivá tơmá mơ-eăm tơkâ luâ xơpá, pê klêi tŭm tơdroăng cheăng pơcháu.