Tơbleăng dêi Khu xiâm Khôi túa lĕm tro, Tơ’noăng ivá ƀă Ôm hyô tối ăm ‘nâi, nôkố lâp tơnêi têa ai lối 40.000 tíu chôu ‘măn tơmeăm khoăng rôh nah ƀă vâ chê 70.000 tơmeăm kơnía khôi túa lĕm tro ‘na ihiâm mơno châ riân. Tung mê ai 37 tơmeăm kơnía rôh nah châ UNESCO chêh inâi. Xông tơpui a rôh pêi cheăng, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ kơvâ khôi túa lĕm tro séa ngăn mơnhên kơtăng ivá mơjiâng, tơpui ƀă pêi pro tâi tâng mâu tơdroăng ki ối tơvâ, tơdrêng amâ hbrâ pro châ hên mâu tơdroăng ti tăng rah xo tơnêi têa ing troăng pêi cheăng djâ vêh pơlê tơmeăm kơnía ing kong têa ê ƀă tah lôi pá puât tíu lôi chúa rak tơdroăng rôh nah mơnhông tơnêi têa lối 80 hơnăm hiăng hluâ.

Ki má môi, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên hnoăng dêi rơxông hâi kố ôh tá xê to gâk kring tơmeăm kơnía dêi mâu jâ nôa pôa pâ nah mê ối hbrâ mơjiâng tơmeăm kơnía rôh nah ăm rơxông la ngiâ. Kơvâ khôi túa lĕm tro kal pêi pro ing troăng tơmiât rak vế ôh tá hbrâ hdrối chiâng hbrâ hdrối mơjiâng tơdroăng tơbâ vế rôh nah tơnêi têa; mơjiâng tơdroăng vâ mơnhên ‘’tơmeăm kơnía rôh nah’’ sap ing tơdroăng pơkâ pêi, mơ’no liăn cheăng ƀă pro “hô sơ tơdroăng tơbâ rôh nah” ăm mâu tơmeăm ki má môi vâ rak vế tâi tâng ki kơnâ rôh nah ton xŏn.