Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối rơdêi nhên, hneăng hôp cho môi tơdroăng tơkêa bro ai pơxúa kal khât tung pơla tơrŭm cheăng Tơrŭm cheăng tung la ngiâ tŭm têk pơla Việt Nam ƀă Australia dế mơnhông mơdêk lĕm, rế hía rế trâu hơngế, păng 'nâng ƀă châ tơƀrê, malối cho tung mâu kơvâ cheăng kô pơkâ ivá tơbriât cheăng ƀă tơdroăng kro mơdrŏng dêi rêm kong têa tung hên chât hơnăm la ngiâ.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối ăm 'nâi, ƀă Việt Nam, mơnhông khoa hok, kŏng ngê̆, pơhlêh nếo tơmiât pêi rơkê ƀă mơngế pêi cheăng rơkê ôh tá xê to môi tơdroăng ki rah xo, mê hiăng chiâng tơdroăng ki kal vâ pêi pro tơdroăng púi vâ chiâng tơnêi têa mơnhông, pêi lo liăn hên a hơnăm 2045. Xua mê, Đảng, Tơnêi têa Việt Nam hiăng mơnhên troăng mơnhông nếo, tung mê tơdroăng ‘nâi klê, khoa hok, kŏng ngê̆, pơhlêh nếo tơmiât pêi rơkê, pơhlêh xúa kŏng ngê̆ kơxô̆ ƀă mot tơrŭm lâp plâi tơnêi châ mơnhên cho mâu ivá mơdêk ki xiâm dêi tơdroăng cheăng kâ.