A rôh hôp tơpui tơno, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, Việt Nam ngăn nhuô̆m tơrŭm cheăng ƀă Panama; khĕn kơdeăn hnoăng cheăng dêi Panama ƀă tíu pêi cheăng cho  xiâm tơdjêp troăng têa kơxĭ, troăng tơƀai, pế pơchên kế kâ  ƀă khoăng ƀă liăn ngân dêi kơpong. Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối loi tơngah péa tơnêi têa kô pơtối xúa châ tơƀrê mâu tơdroăng tơrŭm cheăng tung mâu kơvâ cheăng tê mơdró, pêi chiâk deăng, troăng têa kơxĭ, troăng tơƀai, tơmeăm khoăng, pơhlêh xúa kŏng ngê̆, mơdêk tơrŭm cheăng pơla péa pâ mơnhông tiô troăng rế tơƀrê, châ tơƀrê ƀă krá tơniăn, xua vâ pro pơxúa ăm kuăn pơlê péa tơnêi têa.

Pôa José Raúl Mulino, Kăn xiâm pơkuâ kong têa tối Panama ngăn Việt Nam cho kong têa tơrŭm cheăng ki kal a kơpong châu Á - Thái Bình Dương, hbrâ vâ pro kông tơdjêp vâ Việt Nam po rơdâ tơrŭm cheăng ƀă mâu kong têa Mih Latinh. Péa pâ xuân môi tuăn mơdêk tơrŭm cheăng hbrâ mơdât mâu ngế pro xôi tơkâ luâ tơnêi têa ƀă tơrŭm a mâu hneăng hôp tơpui tơno hên troăng. Klêi kơ'nâi hôp tơpui tơno, péa ngế kăn xiâm châ hlo leh diâp hên hlá mơ-éa tơrŭm cheăng tung mâu kơvâ pơto chơ tơmeăm a têa kơxĭ, pêi chiâk deăng, ôm hyô, ‘na tơƀai, kơno tuk ƀă hnê hriâm.