Kơxê lơ 11/7, a Hà Nội, pôa Trần Lưu Quang, Ngế pro xiâm phŏ hnê ngăn Chin phuh pêi cheăng ƀă Khu xiâm ngăn Khoa hok – Kong ngê̆.  Tối tơbleăng a rôh pêi cheăng, pôa Lê Xuân Định, ngế xiâm phŏ ngăn Khu xiâm ngăn Khoa hok ƀă Kong ngê̆ ăm ‘nâi, troh nôkố, tơdroăng ‘na luât ‘na Khoa hok kŏng ngê̆ ƀă hơ’lêh nếo hiăng hlo pêi pro klêi ƀă 8 to luât ‘na kơvâ cheăng. Khu xiâm hiăng chêh bro, pơtroh ăm Ngế pro xiâm hnê ngăn Chin phuh pơkâ tơdroăng cheăng tung la ngiâ mơnhông khoa hok kong ngê̆ ƀă hơ’lêh nếo troh hơnăm 2030 ƀă ki xiâm cho ăm khoa hok kong ngê̆ ƀă hơ’lêh nếo chiâng tơdroăng ki chiâng ivá mơdêk.

A rôh pêi cheăng, pôa Trần Lưu Quang, Ngế pro xiâm phŏ hnê ngăn tơnêi têa môi tuăn kal ai môi troăng hơlâ pơkâ ki xiâm ăm khoa hok kong ngê̆ ƀă mâu ngế ki cheăng ‘na khoa hok kong ngê̆, tối nhên athế mơjiâng klêi troăng hơlâ luât kum tung tơdroăng pơkuâ ngăn tơnêi têa ƀă mơnhông khoa hok kong ngê̆. Mơnhông ƀă xúa rơdêi Khoa hok kong ngê̆ ƀă hơ’lêh nếo vâ bro ivá tơƀrê má môi, dâi rơkê tơƀrê, ivá tơxup dêi tơdroăng cheăng kâ.