Vâ pâ troh hnoăng ki kân dêi mâu kăn hdrối nah ki rơkê, tung rôh lăm troh a kong pơlê Vĩnh Long, kơxo hâi lơ 4/9, pôa Trần Thanh Mẫn, Kăn xiâm hnê ngăn Kuô̆k hô̆i chôu nhang, pleăng reăng ăm kơ pôa Phạm Hùng, Kăn xiâm hnê ngăn Hô̆i đong, Ngế xiâm hneăng hdrối nah ƀă pôa Võ Văn Kiệt, Ngế pro xiâm hnê ngăn tơnêi têa hneăng hdrối nah. Chêh tung kơxop hlá mơ-éa tơbâ akố, pôa Trần Thanh Mẫn, Kăn xiâm hnâ ngăn Kuô̆k hô̆i rơrêk tung hiâm mơno ƀriê lo têa mâ chôu nháng a um pôa Phạm Hùng, Kăn xiâm hnê ngăn Hô̆i đong Ngế xâm hneăng hdrối nah - Cho ngế pơkuâ ki rơkê hên ngế nhoăm pâ dêi Đảng, Tơnêi têa pin,  ngế kuăn ki rơkê  dêi pơlê xiâm Vĩnh Long khên tơnôu.

Têk nhang, pleăng reăng a Kơpong tơbâ dêi pôa Võ Văn Kiệt, Ngế pro xiâm hnê ngăn Chin phuh hneăng hdrối nah, a tơring Vũng Liêm, pôa Trần Thanh Mẫn, Kăn xiâm hnê ngăn Kuô̆k hô̆i rơtế ƀă mâu kăn lăm pêi hnoăng cheăng hiăng mơhno hiâm mơno nhoăm pâ kơ pôa Võ Văn Kiệt Ngế pro xiâm hnê ngăn tơnêi têa hneăng hdrối, ngế ki hiăng plâ rơxông pêi cheăng ăm Kăch măng, tơmâng khât tơdroăng tơnêi têa, vâ ƀă kuăn pơlê, rêh ối môi tiah kuăn pơlê, ôh tá pơkrip, đi đo ăm tơdroăng cheăng ki pơxúa dêi Đảng, Tơnêi têa dêi kuăn pơlê pêi ahdrối; cho môi ngế ki djâ troăng lĕm, ‘na hiâm mơno tơdroăng cheăng kăch măng; kơhnâ, ‘nâi kơdĭng, tơdrăng, pro tơdroăng ki tro, khên tơnôu dêi môi ngế Kŏng san ki lĕm ƀă plâi nuih têm rơpiêt đi đo ta ah, xuân ối tung hiâm mơno kuăn pơlê pin ƀă mâu vâi pú tung lâp plâi tơnêi.