Kơxo hâi lơ 13/7, a kong pơlê Phú Thọ, pôa Võ Văn Thưởng, Kăn xiâm hnê ngăn tơnêi têa séa ngăn tơdroăng hbrâ vâ tơplâ hlối pêi cheăng ƀă Khu xiâm pơkuâ ngăn lêng Kuân khu 2 ‘na tơdroăng cheăng lêng, tơdroăng kring gak tơkăng kong 6 khế apoăng hơnăm 2023. Tơbleăng a rôh pêi cheăng, pôa Võ Văn Thưởng, Kăn xiâm hnê ngăn tơnêi têa tối, Kuân khu 2 cho kơpong rơdâ, ai tíu ki kal ai hnoăng cheăng pêi dêi mâu lêng tơplâ Kuân khu 2 kal păng ‘nâng, tơdroăng cheăng hngăm hngo, malối tung pơla ai tơdroăng ôh tá tơniăn tung lâp plâi tơnêi, kơpong rơ-iô, tung tơnêi têa xuân nhôm ai tơdroăng ôh tá tơniăn, pá vâ ‘nâi hdrối.

Malối ƀă mâu tơdroăng cheăng ki kal ki mâu lêng vâ pêi tung 6 khế mơ’nui hơnăm , Kăn xiâm hnê ngăn tơnêi têa pơkâ thế, tung la ngiâ, mâu kơ koan, tíu pêi cheăng, đông lêng, mâu lêng tung Kuân khu 2 pơtối tăng ‘nâi nhên, tối mâu tơdroăng ƀă tơbleăng hdrối nhên tro tiô tơdroăng, malối mâu tơdroăng ki tơdjâk ‘na lêng, kring vế tơniăn pơlê pơla tơnêi têa; hbrâ rơnáu, teăm tí tăng ‘nâi plĕng mâu tơdroăng tối ăm Đảng, tơnêi têa, Khu xiâm pơkuâ hnê ngă Đảng lêng tơnêi têa ƀă Khu xiâm  ngăn lêng gak tơkăng kong ai troăng pơkâ tơtro, pôi tá ăm kơdrâ tung tŭm tơdroăng; Kring gak tíu tơkăng kong tơnêi têa, hnoăng pơkuâ, môi tuăn ƀro hơniâp lâp tơnêi têa.