Peăng xêi hâi lơ 10/7, Kăn xiâm hnê ngăn tơnêi têa tơdah kăn teăng mâ Kŏng hòa Pơhlăng cho pôa Nicolas Warnery troh koh hmât drêng mơgêi dêi hneăng cheăng a Việt Nam. Pôa Võ Văn Thưởng, Kăn xiâm hnê ngăn tơnêi têa rơhêng vâ ƀă tơngah, maluâ a mâu tơdroăng hnoăng cheăng ki lâi, kăn teăng mâ kô pơtối mơhno mâu tơdroăng ki tơniăn lĕm ‘na tơnêi têa, kuăn mơngế Việt Nam, cho kông tơdjêp mơdêk rơdêi tơrŭm cheăng khôi hmâ ƀă Kong têa tơrŭm cheăng tung la ngiâ Việt Nam – Pơhlăng.

Rơkâu kăn teăng mâ cho Nicolas Warnery pêi klêi dêi hnoăng cheăng a Việt Nam, kăn xiâm hnê ngăn tơnêi têa tối nhên, 50 hơnăm hdrối nah, tơrŭm cheăng Việt Nam – Pơhlăng hiăng pêi châ hên mâu tơdroăng ki tơƀrê, malối cho tung pơla 10 hơnăm mơjiâng tơrŭm cheăng kong têa tung la ngiâ. Việt Nam mơnê tŏng kum kơnía git dêi Pơhlăng hiăng kum lối rơtuh klŏng vaccine hbrâ mơdât COVID-19.

Vâ mơdêk tơrŭm cheăng péa tơnêi têa tung la ngiâ, Kăn xiâm hnê ngăn tơnêi têa pơkâ thế péa pâ pơtối mơdêk mâu rôh trâm mâ, tơpui tơno, mâu rôh lăm pôu dêi mâu kăn xiâm. Ing kăn teăng mâ, kăn xiâm hnê ngăn tơnêi têa pơtroh rơkong krếo thế ƀă tơbleăng Việt Nam hbrâ rơnáu tơdah pôa Emmanuel Macron, kăn xiâm pơkuâ kong têa Pơhlăng pôu Việt Nam tung rôh ki tơtro.