Kơxo lơ 15/9, a Hngêi Kuô̆k hô̆i, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa ƀă kơdrâi pôa pơkuâ leh tơdah Pơtáu kong têa Siam ƀă Kơdrâi pơtáu. Rôh lăm pôu tơkŭm po tro rôh péa tơnêi têa leh tơbâ 50 hơnăm mơjiâng tơrŭm tơpui kâ – kơdró eăng lĕm tung rôh nah mơnhông tơrŭm pơla péa pâ.

Rôh lăm pôu dêi Pơtáu kong têa Siam pêi pro mâu tơkêa tơpui kâ râ kăn xiâm pơla péa kăn xiâm pơkuâ tơnêi têa tung pơla kố nah, ki má lối cho tơkêa pêi pro châ tơƀrê troăng pêi cheăng ton xŏn ‘’Pái tơdjêp’’. Mê cho tơdroăng tơdjêp pơtroh tê tơmeăm, tơdjêp pêt mơjiâng tơmeăm ƀă cheăng kâ pơla péa pâ; tơdjêp khu tê mơdró ƀă kong pơlê; Tơdjêp mâu troăng pêi cheăng ton xŏn tơtêk krá tơniăn; mơ-eăm rĕng djâ pêi lo liăn tê mơdró pơla péa pâ châ kơlo 25 rơtal dollars tiô troăng tơdâng tơ’mô, krá tơniăn.

Rôh lăm pôu pêi cheăng kô ‘măn môi kơdró nếo tung tơdroăng tơrŭm pơla péa tơnêi têa, djâ tuăn tuăn pâ nhŏng o Việt Nam – Siam mơnhông rế hía rế mot trâu hơngế, păng ‘nâng, krá tơniăn ƀă châ tơƀrê, xua pơxúa dêi kuăn pơlê péa tơnêi têa, xua hơniâp lĕm, tơniăn ƀă mơnhông kro mơdrŏng dêi kơpong.