Kơxo lơ 10/7, Hô̆i đong Pơlê kong kân Hồ Chí Minh pơxiâm po Hneăng hôp roh má 10, hneăng má X vâ tơpui tơno, séa ngăn, tơbleăng mơ-éa dêi Vi ƀan pơlê kong kân pêi pro Pơkâ kơxô̆ 98 ‘na mơnúa mâu troăng pơkâ pêi, troăng hơlâ ki phá tơ-ê mơnhông mơdêk Pơlê kong kân Hồ Chí Minh ƀă mâu tơdroăng xiâm ki kân ki ê. Veăng ƀă xông tơpui a hneăng hôp, pôa Nguyễn Văn Nên, Kăn pơkuâ hnê ngăn cheăng Đảng Pơlê kong kân Hồ Chí Minh pơkâ thế Hô̆i đong pơlê kong kân prôk trâu hơngế mơnhên tơdroăng cheăng kâ – rêh ối pơlê pơla pơlê kong kân, ki rơhêng vâ tối cho tơdroăng ki tá hâi châ vâ pơkâ mơ’no troăng tah lôi pá puât, hnoăng cheăng ki nhên tung la ngiâ.

 Ƀă pơkâ pêi pro Pơkâ 98 dêi Kuô̆k hô̆i ‘na mơnúa mâu troăng hơlâ, troăng pơkâ pêi ki phá tơ-ê mơnhông mơdêk pơlê kong kân Hồ Chí Minh, pôa Nguyễn Văn Nên tối, tung 7 khu troăng pơkâ pêi, troăng hơlâ châ Pơkâ tơbleăng pêi pro mê hnoăng cheăng ki Kuô̆k hô̆i pơcháu ăm Hô̆i đong pơlê kong kân cho kân ‘nâng ƀă 14 tơdroăng cheăng ki kal.

Hneăng hôp má 10, Hô̆i đong kuăn pơlê Pơlê kong kân Hồ Chí Minh kô tơkŭm po tung 2,5 hâi. Mâu kăn teăng mâ tơpui tơno nhên ‘na mơ-éa tơbleăng Pơkâ pêi pro Pơkâ kơxô̆ 98 dêi Kuô̆k hô̆i ‘na mơnúa mâu troăng pơkâ pêi, troăng hơlâ ki phá tơ-ê mơnhông mơdêk Pơlê kong kân Hồ Chí Minh.