Vâ rak tơniăn hnoăng, ki pơxúa dêi mơngế ki ai tơnêi tro xo tơvêh, rak tơniăn 'mâi hơ'lêh tíu ối, tơdroăng rêh ối ƀă tơdroăng cheăng kâ, kơxop hlá mơ-éa Luât tơnêi ('mâi hơ'lêh) hiăng pơkâ mơngế ki ai tơnêi ối tro xo tơvêh châ chêl thiê̆n ƀă tơnêi ki ai tơdâng tơ'mô ƀă tơdroăng ki xo tơvêh, tơnêi ki ê lơ chêl thiê̆n ƀă liăn. 'Na tơdroăng kố, pôa Đặng Đức Hiệp (kong pơlê Lâm Đồng) tối tiah kố, kal séa ngăn nhên tơdroăng ki xúa xo tơvêh tơnêi ton xŏn ƀă mâu tơdroăng tơkêa bro ai tơdroăng ki phá tơ-ê.

Tơdroăng ki ai khât ing tơdroăng ki chiâ xo bauxite a ƀăng tơnêi kân rơdâ a Lâm Đồng tơdjâk troh hên rơpŏng kuăn pơlê, mâu kăn mơhno tối tiah kố, tơdroăng ki chiâ xo bu chiâ xo a tơnêi rơtâ tá tung pơla iâ hâi ƀă kô chiâng vâ vêh mơdrếo tơnêi. Tâng xúa tơdroăng ki xo tơvêh ton xŏn kô pro pá kân 'na liăn ngân chêl thiê̆n, tăng tơnêi ƀă vêh pro pơlê nếo. Ing tơdroăng ki ai khât kố, pôa Đặng Đức Hiệp pâ thế:

“Pin xuân chiâng hriăn plĕng tơdroăng ki xo tơvêh tơnêi ki ai hâi khế lơ cho Tơnêi têa mung tơnêi dêi kuăn pơlê vâ tơniăn ăm tơdroăng ki chiâ xo tơmeăm khoăng tung kơdâm tơnêi. Tiah mê rế kơdroh tơdroăng ki pro pá ‘na liăn ngân, rế kơdroh tơdroăng chêl thiê̆n, 'mâi xĕn tíu ối, xĕn tíu pêi cheăng; kơdroh châ yă ki chiâ xo vâ tơniăn tơdroăng ki tơxup tơbriât ăm mâu tơmeăm ki uâ mơdiê pro kơ'nâi ah. Tơdroăng kố kal châ hriăn plĕng tơ'nôm tung luât vâ pro tơ'lêi hlâu má môi ăm tơdroăng ki chiâ xo tơmeăm khoăng tung kơdâm tơnêi ƀă ki nhên cho chiâ xo bauxite a Lâm Đồng.

Rơtế tơmâng troh tơdroăng pơkuâ ƀă xúa châ tơƀrê tơmeăm khoăng a tơnêi tơníu, pôa Bùi Xuân Thống (Pơlê kong kân Đồng Nai) môi tuăn ƀă tơdroăng pơkâ 'mâi hơ'lêh klâ tơnêi, tơdrêng amê pơkâ thế kal mơnhên tơdroăng pơkâ 'na tơnêi kong vâ rơnêu tơdroăng pơkâ ki ôh tá tơdâng tơ'mô pơla kơvâ rak ngăn tơnêi tơníu ƀă kơvâ rak ngăn pêt kong. 'Na hnoăng ƀă ki pơxúa dêi mơngế xúa tơnêi, pôa pơkâ thế 'mot tơ'nôm pơkâ rak vế mơngế ki xo pơcháu, xo veăng tơlo liăn ƀă hnoăng xúa tơnêi ƀă kế tơmeăm ki hmâ ƀă tơnêi châ pơtối xúa tro tơdroăng tung pơla xúa tơnêi ki u ối. Ƀă troăng hơlâ mung tơnêi pêi chiâk deăng pro tơmeăm khoăng, pôa Bùi Xuân Thống tối:

“Ing tơdroăng ki ai khât dêi Đồng Nai, mâu kơpong ki kal vâ xo mâu tơmeăm khoăng tung kơdâm tơnêi vâ pro tơmeăm mơjiâng hngêi trăng tơmeăm khoăng pơxúa ăm tơdroăng ki kal, tung pơla nôkố xúa tơnêi ai tá tơnêi pêt loăng plâi ton hơnăm, tơnêi pêt loăng plâi rêm hơnăm ki ê. Xua mê, pơkâ thế ôh tá pơkâ to ƀă kong pêi chiâk deăng cho kong ki pêt mê hriăn plĕng pơkâ tiô troăng tơmiât tâi tâng mâu tơnêi tơtro, tung mê, ai tơnêi pêt loăng plâi ton hơnăm, tơnêi pêt loăng plâi rêm hơnăm ki ê vâ pro xiâm luât xúa mâu tơdroăng ki ai khât ki nếo.