Tung rôh hôp kố, Vi ƀan pơkuâ Kuô̆k hô̆i kô pơtối séa ngăn, ăm rơkong veăng tơpui tung hên tơdroăng tơkêa bro ƀă tơdroăng pơkâ. A rôh hôp kố, Vi ƀan pơkuâ Kuô̆k hô̆i séa ngăn, tơbleăng mâu kơxop hlá mơ-éa Pơkâ môi tiah: Pơkâ ‘na Tơdroăng mơjiâng luât hơnăm 2027; Pơkâ tơdroăng mâu kơ koan séa ngăn châ xo ing môi mâu kơxô̆ liăn xo tơvêh, châ hlo ing klêi kơ’nâi séa ngăn klêi kơ’nâi nâp liăn ngân tơnêi têa ‘na hrê ăm tơdroăng cheăng ƀă mơdêk ivá pêi cheăng dêi kơ koan séa ngăn; Pơkâ kố  ai mơnhên ‘na troăng hơlâ rak vế Hnoăng pơkuâ.

‘Na hnoăng cheăng séa ngăn, Vi ƀan pơkuâ Kuô̆k hô̆i kô ăm rơkong tơpui ‘na tơbleăng hnoăng cheăng hơnăm 2026, tiô tối hdrối Túa pơkâ séa ngăn liăn ngân hơnăm 2027 dêi Riân ngăn liăn ngân tơnêi têa; séa ngăn tối tơbleăng hnoăng cheăng hnê mơhnôk dêi Kuô̆k hô̆i khế 8/2026. ‘Na pơkâ mâu tơdroăng ki kal, Vi ƀan pơkuâ Kuô̆k hô̆i kô ăm rơkong tơpui ‘na tơdroăng pơkâ pêi dêi tơnêi têa hbrâ mơdât mâu ngế pro xôi pơla hơnăm 2026 – 2030, troăng pêi troh a hơnăm 2035.