A rôh hôp, pôa Lê Minh Hưng, Ngế pro xiâm hnê ngăn tơnêi têa tối nhên, tơdroăng ki kêi đeăng mâu hnoăng tơkêa bro luât thế tiô pơkâ kơtăng: Tơniăn tro tiô pơkâ, tiô luât, tơdroăng ki tơrŭm môi tuăn, tơdâng tơ’mô ƀă chiâng pêi pro dêi khu luât. Khŏm ôh tá pêi pro tung tơdroăng tơkêa bro luât tiô mâu troăng hơlâ tá hâi châ mơnhên ki tơdjâk tŭm têk, ôh tá păng ‘nâng, kal khât lơ ôh tá gum tơdrêng ăm pơkâ ki ‘mâi rơnêu.

Mot rôh má 2 dêi Hneăng hôp ôh tá tiah hmâ rôh má môi, Kuô̆k hô̆i hneăng má XVI, Ngế pro xiâm hnê ngăn tơnêi têa pơkâ thế mâu Khu xiâm, kơvâ cheăng tơkŭm hên ăm tơdroăng tơmâng xo, tiâ tối, rơnêu nếo mơ-éa chêh hdrối; pêi tiô tơdroăng hneăng hôp ƀă tơrŭm krá ƀă mâu Vi ƀan, kơ koan dêi Kuô̆k hô̆i vâ teăm tơleăng tơdrêng mâu hnoăng cheăng mê ki ối tơpui pơrá phá dêi pó.