Pêi pro xing xoăng hnoăng dêi Khu hnê mơhno cheăng Tơnêi têa ‘na hbrâ ví ƀă kong mê khía mơhot têa kan lân lu hâi lơ 12/7. Khu kăn ki pêi dêi hnoăng cheăng dêi Khu xiâm pơtâng tối tơdroăng kal tiô troăng hyoh um tơvi, rơ’jiu, internet xua pôa Phạm Đức Long, ngế xiâm phŏ ngăn khu pơtâng tối tơdroăng kal tiô troăng um tơvi, rơ’jiu, internet pơkuâ djâ khu kăn kố hiăng pêi cheăng ƀă kong pơlê Kon Tum ‘na hnoăng cheăng hbrâ ví khía mơhot têa kân lân lu. Tối tơbleăng dêi Khu pơkuâ Hbrâ ví khía mơhot têa kân lân lu – Tí tăng tŏng xo mâu ngế xơpá hliăng tiâ ƀă Hbrâ mơdât kuăn pơlê kong pơlê Kon Tum ƀă khu kăn ki pêi dêi hnoăng cheăng ăm hlo, troh nôkố tâi tâng tá 102 to cheăm, bêng, pơlê kân dêi kong pơlê hiăng mơjiâng khu ki pleăng dêi hnoăng cheăng tung hbrâ ví khía mơhot têa kân lân lu ƀă lối 5.200 ngế; tâi tâng a 10 tơring, pơlê kong kơdrâm hiăng pơkâ tŭm tơdroăng ki pêi pro châ tiô tơdroăng ki rơhêng vâ châ tŏng kum dêi kuăn pơlê ƀă tiô pơkâ ‘na hbrâ ví khía mơhot têa kân lân lu châ rak vế tơniăn.

Tơpui a rôh pêi cheăng, pôa Phạm Đức Long tối nhên troh túa pơkâ “4 tơdrêng” tung hbrâ ví khía mơhot têa kân lân lu; tơdroăng ki mơdêk hnoăng cheăng hnê tối tung um tơvi, mơjiâng túa pơkâ túa hbrâ ví khía mơhot têa kân lân lu, rơtế amê cho athế pêi teăm tơdrêng hơ’lêh túa pơkâ hbrâ ví khía mơhot têa kan lân lu hdrối mâu tơdroăng ki ôh tá tơniăn dêi kong prâi.