Vesak lơ tĭng Tam hợp (leh tơbâ hâi khu kuăn mơngế ƀă kuăn kiâ a rŏng tơnêi, pơxiâm loi tơdroăng khôp Phop ƀă Hiăng chiâng hnun Xeăng Phop) dêi Phop Thích Ca Mâu Ni châ ngăn cho tơdroăng mơhno khôi túa lĕm tiô khôp xua hơniâp lĕm ƀă châ mơnhên păng ‘nâng a Grup kring vế Khu lâp kong têa hneăng má 54 hâi lơ 15/12/1999.

Sap hơnăm 2000 troh nôkố, Tĭng kân Vesak Khu lâp kong têa hiăng châ tơkŭm po 19 xôh, tung mê Việt Nam hiăng po ƀă tơkŭm po châ tơƀrê pái xôh: hơnăm 2008 a Tíu xiâm Hneăng hôp Tơnêi têa Mỹ Đình, Hà Nội; hơnăm 2014 a hngêi chuô Bái Đính, kong pơlê Ninh Bình; ƀă hơnăm 2019 ƀă hngêi chuô Tam Chúc, kong pơlê Hà Nam.

Ƀă mâu tơdroăng châ tơƀrê mê, Việt Nam pơtối châ rah xo po ƀă tơkŭm po Tĭng kân Vesak Khu lâp kong têa roh má 20 hơnăm 2025 a Hok viê̆n Phật yăo Việt Nam, tơring Bình Chánh, Pơlê kong kân Hồ Chí Minh.

Cho ngế hiăng hên xôh veăng tĭng kân a Việt Nam, Ƀok Phop Tiê̆n sih Tampalawela Dhammaratan – Phŏ Kăn hnê ngăn hnê mơhno má môi Vi ƀan Lâp plâi tơnêi Vesak Khu lâp kong têa (ICDV) tối tơdroăng ki hâk hdrối mâu tơdroăng mơ-eăm dêi Việt Nam tung tơdroăng pêi ki má môi tơmeăm kơnía hdroâng mơngế ƀă Khôp Phop.

‘’Vesak Khu lâp kong têa 2025 cho kal khât, ôh tá xê to roh má 4 Việt Nam tơkŭm po mê cho xua 50 hơnăm tơniăn krê tơnêi têa chiâng môi tơnêi têa 2 kơpong vêh tơkŭm a 1 tíu. Pakĭng tơdroăng môi tuăn păng ‘nâng dêi Chin phuh Việt Nam ối ai tơdroăng pơkuâ dêi Khu pơkuâ Khôp Phop Việt Nam mê ối a ko cho Ƀok Phop Thích Trí Quảng. Kố cho 1 um méa, cho 1 túa pêi ki nếo ki Tơdroăng Khôp Phop lâp plâi tơnêi kô chiâng vâ mơnhên ngăn ƀă hriâm. Á hlo cho tơdroăng khôi túa lĕm ƀă hên tơdroăng ki ê hdrối tung ƀă kơ’nâi Tĭng kân mơjiâng tơdroăng ki mơhnhôk ăm kuăn pơlê veăng cho lĕm ‘nâng’’.

Veăng Vesak Khu lâp kong têa 2025 a Pơlê kong kân Hồ Chí Minh hơnăm kố ai 1.300 kăn teăng mâ lâp plâi tơnêi cho mâu ƀok Phop lâp plâi tơnêi; mâu khu ki hriăn plĕng, mâu ngế ki ai tuăn ngôa rơkê... troh ing 85 tơnêi têa kơpong tơnêi tơníu. Tơdroăng ki kố ôh tá xê ăm hlo tơdroăng ki loi tơngah dêi tơnêi têa mê ối mơnhên châ hnoăng tíu ối dêi Tơdroăng Khôp Phop Việt Nam tung kuăn khôp Phop lâp plâi tơnêi.

Tĭng kân Vesak Khu lâp kong têa roh má 20 hơnăm 2025 pơxá inâi mê cho ‘’Tơrŭm môi tuăn ƀă ai hiâm mơno lĕm xua tuăn mơno lĕm kuăn mơngế: pơklêi tah tơdroăng xôi Tơdroăng Khôp Phop xua Hơniâp lĕm lâp plâi tơnêi ƀă Mơnhông krá tơniăn’’. Tĭng kân tơkŭm po ƀă hên tơdroăng ki xiâm môi tiah leh pơxiâm po, mâu roh hôp tơpui tơno lâp plâi tơnêi, tĭng tơdah xá lợi Phop, tơdroăng ngê̆ thuât koh phiu ro, hôp tơpui tơno hok thuâ̆t ƀă mâu tơdroăng trâm mâ mơhno khôi túa lĕm ‘na tuăn loi tĭng khôp Phop ƀă hía hé.

Xông tơpui a Tĭng kân, teăng mâ khu râ kăn pơkuâ Đảng, Tơnêi têa Việt Nam, pôa Lương Cường, Kăn xiâm hnê ngăn tơnêi têa tối nhên, mâu  ki kơnâ xiâm dêi yăo lĭ hnê ‘na hiâm mơno lĕm – Tuăn ngôa rơkê ki Phop hnê xuân ối rak ki kơnâ ƀă kuăn mơngế hâi kố. Mâu ki kơnâ môi tiah hiâm mơno pâ nhuô̆m tơnêi têa, hiâm mơno lĕm ôh tá ‘nhó kơ vâi, hiâm mơno tơmiât lĕm dêi Tơdroăng Khôp Phop hiăng mot tung hiâm mơno mơngế Việt Nam ƀă kum mơjiâng pro khôi túa lĕm hdroâng mơngế Việt Nam. Pôa Lương Cường, Kăn xiâm hnê ngăn tơnêi têa tối ăm ‘nâi:

‘’Đảng, Tơnêi têa Việt Nam đi đo kheăn kơdeăn ƀă pro tơ’lêi hlâu vâ mâu tơdroăng tiô khôp, tung mê ai Khôp Phop tiô tung tơdroăng tro luât, pêi pro môi tuăn pơkuâ troăng hơlâ nhuô̆m ƀă gâk kring hnoăng tơniăn krê loi tĭng, tơdroăng tiô khôp dêi rêm ngế ƀă ngăn mê cho tơdroăng xiâm ki kal vâ mơjiâng khu tơrŭm môi tuăn tâi tâng hdroâng mơngế. Mâu kuăn khôp, ƀok Phop Việt Nam hiăng, dế ƀă pơtối tơdjuôm ivá rơtế kuăn khôp Phop, Ƀok Phop lâp plâi tơnêi pêi tơdroăng khôp Phop ƀă kuăn mơngế, xua pơkâ xiâm cho hơniâp lĕm, tơrŭm nhŏng o, tơrŭm ƀă mơnhông mơdêk’’.

Tĭng kân Vesak Khu lâp kong têa 2025 a Pơlê kong kân Hồ Chí Minh cho 1 tơdroăng ki má môi tung mâu tơdroăng pêi kum Việt Nam veăng kum hên tâ tung pơkâ pêi rơpâu hơnăm dêi Khu lâp kong têa xua hơniâp lĕm ƀă mơnhông krá tơniăn.