Tơdroăng kố cho vâ thăm mơdêk tơrŭm tŭm sap ing kơpong pêt, uâ pơliê troh a (lo-ji-stiks) logistics ƀă tê sầu riêng. Ai lối 44.000 ha ƀă plâi gá tiô tối hdrối kô châ 500.000 tâ̆n tung hơnăm 2026, Dak Lak ai pơxúa kân ‘na rơnó krí plâi ton sap ing khế 8 troh khế 10. Teăng mâ mâu khu mơdró kâ Sinuâ tối nhên tơdroăng ki rơhêng vâ sầu riêng ối drêh lĕm, ai pơluăn ki ‘măn rak pro hngíu ƀă troăng mơnhông tê plâi ing troăng hyôh internet dế hlo rế hên.

Pôa Lê Anh Trung, Kăn hnê ngăn Khu tơrŭm hnê mơhno cheăng Sầu riêng Dak Lak tơngah péa pâ ôh tá xê to pơtê a tơdroăng ki roê tiô rơnó mê kô rơtế mơjiâng tíu ki kơnía ing tơdroăng ki uâ pơliê trâu, ‘măn rak, pơhlêh xúa kong ngê̆ internet ƀă tê mơdró điê̆n tưh krá ton.