Nôkố, troăng prôk kơpong Tơdế tơnêi têa - Tây Nguyên chôa lâng ‘no liăn mơjiâng tơmeăm khoăng, malối cho mâu troăng kân tơdrăng Pa Kơnhŏng – Pa Hdroh ƀă mâu troăng kâ tơdjêp Peăng mâ hâi Lo - Mâ hâi Lu pơla Tây Nguyên ƀă kơpong kĭng têa kơxĭ. Hên tơdroăng tơkêa bro  dế châ tơbleăng môi tiah Quy Nhơn – Pleiku, Khánh Hòa – Buôn Ma Thuột, Gia Nghĩa – Chơn Thành… châ tơngah po tơ’nôm tíu mơnhông tơƀrê hôm, pêi iâ hâi ki pơtroh ƀă pro hlâu ăm ‘na ôm hyô, logistics, tê mơdró.

Laga, tiô mâu kăn, ‘no liăn pro tơmeăm khoăng ôh ti xê to pơtê a tơdroăng pơtối pro mâu troăng prôk. Tơdroăng ki kal tâ cho thế mơjiâng tíu pêi cheăng tơdjêp ƀă dêi rơpó pơla mâu kơphô̆, kơno tuk, tơraih tơƀai, tíu gak ngăn ‘na tê mơdró tơkăng kong, tíu xiâm cheăng logistics ƀă mâu tíu troh ôm hyô tung kong pơlê. Pôa Nguyễn Trùng Khánh, Ngế xiâm pơkuâ ngăn Ôm hyô Tơnêi têa Việt Nam tối tiah kố, troăng prôk cho tơdroăng khŏm thế pêi pro vâ pơxúa tơmeăm khoăng ‘na ôm hyô.

“Á tơmiât tơdroăng ki kal apoăng thế pro cho troăng prôk, tâng ôh tá ai troăng prôk mâu tíu vâ troh lăm ôm hyô mơngế vâ lĕm to lâi lơ hên tíu, xuân ôh tá pơxúa klâi, ôh tá châ vâ mơnhông tơbrê. Tối ‘na troăng prôk ôh tá xê to pro troăng prôk tối tơdjuôm mê ối tá mâu troăng prôk troh a mâu tíu ôm hyô mê nếo pro pơxúa tơmối vâ troh lăm ngăn, mơdêk ki tơƀrê lĕm vâ châ hên ngế troh”.

A rôh hôp, mâu kơ koan rak ngăn, kong pơlê ƀă khu mơdró hiăng rơtế ƀă dêi rơpó tơpui ‘na luât ‘no liăn mơjiâng pro, mơhnhôk tăng liăn ing pơlê pơla, mơnhông logistics, ‘mâi pro lĕm mâu tơmeăm khoăng a mâu kơpong, mâu tíu ôm hyô ƀă mơdêk tơrŭm pơla mâu cheăm bêng tung kong pơlê. Tíu ki tơdjuôm châ môi tuăn cho pơ’lêh ing tuăn tơmiât troh mơnhông ôm hyô tiô tơnêi hdró troh mơnhông tiô tơdroăng pro lĕm mâu tíu vâ lăm troh ngăn.

Ƀă Gia Lai, klêi tơ’mot tơdjuôm têa kơxĭ ƀă tơbăng ngo, kong pơlê  ai hên tơmeăm vâ mơjiâng pro tiô troăng “Têa kơxĭ- tơbăng-tơbăng ngo - kong ngo”. Jâ Nguyễn Thị Thanh Lịch, Phŏ kăn hnê ngăn Vi ƀan kong pơlê Gia Lai tối tiah kố, ‘no liăn pro troăng prôk troh mâu kơpong hlối cho ki xiâm vâ tung la ngiâ dêi tâi tâng kơpong Tơdế tơnêi têa troh Tây Nguyên, hnối pơkâ troh tơdroăng mơnhông tơbrê 2 kơxô̆ dêi rêm kong pơlê tung mâu hơnăm la ngiâ:

“Drêng po rơdâ pro tíu nếo tung mê ai tơmeăm khoăng ôm hyô ôh ti xê to Gia Lai tâk 2 kơxô̆ mê mâu kong pơlê, pơlê kong kân rơtế pro tơniăn ƀă dêi rơpó ‘na ki mơnhông tơƀrê tơdjuôm”.