Hâi lơ 12/7, a Hà Nội, Vi ƀan ngăn Kuăn ngo tơkŭm po hneăng hôp mơgêi tơdroăng cheăng kuăn ngo 6 khế apoăng hơnăm, tơbleăng tơdroăng cheăng pêi 6 khế mơ’nui hơnăm 2023. Hneăng hôp, Ngế xiâm, Kăn hnê ngăn Vi ƀan kuăn ngo Hầu A Lềnh tối, pakĭng mâu tơdroăng kal tơdjâk troh tơdroăng pơkâ dêi tơnêi têa ‘na mơnhông cheăng kâ rêh ối kơpong hdroâng kuăn ngo ƀă kong ngo pơla hơnăm 2021-2030.

Nôkố, Vi ƀan ngăn kuăn ngo ối tơbleăng hên  tơdroăng kal ki ê, mê cho: Luât pơkâ tŏng kum ƀă mâu ngế ki kuăn pơlê pâ nhoăm; Tơdroăng tơkêa bro “kơdroh rĕng xo on veăng drêng tá hâi tro hơnăm, xo on veăng ki ối pơdjuôm môi mơheăm hdrông hdrê tung hdroâng kuăn ngo”; Tơdroăng tơkêa bro “kơjo kum ôh tá pơrah pơla kơdrâi ƀă kơnốu tung kơpong kuăn ngo pơla hơnăm 2018-2025”; Pêi pro mâu tơdroăng Pơkâ dêi Chin phuh ‘na tơdroăng cheăng kuăn ngo...  xuân tiô Ngế xiâm, Kăn hnê ngăn Vi ƀan kuăn ngo Hầu A Lềnh tối, pơkâ 88 dêi Kuô̆k hô̆i hiăng tối nhên 8 tơdroăng pêi pro ki kal tung tơdroăng hnê ‘na kuăn ngo, tung mê, ai hnoăng cheăng pêi tơƀrê Tơdroăng pơkâ dêi tơnêi têa mơnhông cheăng kâ - rêh ối kơpong kuăn ngo ƀă kong ngo , 7 tơdroăng cheăng ki u ối cho kal, ôh tá chiâng lôi.