Kơxo lơ 11/7/2023, a Jakarta, Indonesia, pôa Bùi Thanh Sơn, Ngế xiâm tơpui kâ ƀă kong têa ê hiăng trâm krê pôa Xạ-lảm-xay Côm-ma-xít, Ngế pro xiâm hnê ngăn, Ngế xiâm tơpui kâ ƀă kong têa ê dêi kong têa Lếo klăng roh veăng Hneăng hôp Ngế xiâm tơpui kâ kong têa ASEAN roh má 56 dó inâi AMM-56.

Péa Ngế xiâm kheăn kơdeăn tơdroăng tơrŭm cheăng pơla péa Khu xiâm tơpui kâ Việt Nam ƀă Lếo; tối môi hiâm mơno ƀă tơdroăng châ tơƀrê păng ‘nâng dêi tơdroăng séa ngan kal kí râ Ngế xiâm phŏ tơpui kâ kong têa ê roh má 8 (Lếo, khế 6/2023); mơnhên kô tơrŭm thăm mơdêk ƀă pêi pro châ tơƀrê mâu kơvâ tơrŭm cheăng, ki rơhêng vâ tối cho tơpui kâ cheăng kâ tung pơla tơdroăng cheăng kâ kơpong ƀă lâp plâi tơnêi ai hên tơdroăng ki ôh tá tơniăn.

Péa pâ môi tuăn kô tơrŭm krá tơniăn, môi tuăn dêi pó a mâu hneăng hôp tơpui tơno hên pâ, ki má lối cho tung ASEAN ƀă mâu troăng tơrŭm cheăng kơpong Mekong ƀă hía hé.