Pơla hdrối kố nah, Kơ koan teăng mâ kơpong Tây Nguyên hiăng kơhnâ tơmâng, tơbleăng mâu tơdroăng pơkâ hnê mơhno dêi Đảng, hlá mơ-éa pơkâ troăng hơlâ dêi Đảng, luât tŏng gum, luât dêi Tơnêi têa ƀă tơdroăng hnê mơhno dêi Rơ'jíu xiâm Việt Nam 'na cheăng lêng, kring tơniăn, hbrâ, tơplâ mơdât khu 'mêi, hbrâ mơdât on chếo, tơniăn tơdroăng kal ƀă rak vế tơdroăng pơkí dêi tơnêi têa.

Mơgêi roh séa ngăn, pôa Vũ Hải Quang tối nhên Kơ koan teăng mâ kơpong Tây Nguyên cho tíu pêi cheăng ki kal dêi Rơ'jíu Việt Nam, ai tíu pêi cheăng, hnoăng cheăng ki kal tung pêi mâu tơdroăng cheăng tối tơbleăng, hnê tối tung kong pơlê. Pôa pơkâ thế Kơ koan pơtối mơnhông hnoăng cheăng tối tơbleăng ki xiâm, teăm tơdrêng tơbleăng troăng hơlâ, troăng pơkâ dêi Đảng, troăng hơlâ, luât dêi Tơnêi têa troh kuăn pơlê, malối cho kuăn pơlê mâu hdroâng kuăn ngo; hbrâ rơnáu tăng 'nâi plĕng, tối tơbleăng tro tơdroăng ki ai khât a pơlê cheăm, veăng kum rak tơniăn kal kí, cheăng lêng, gâk kring.