Kơxê hâi lơ 22/2, Hô̆i đong Kring vế Liăn ‘măn kơdĭng kum vâi hdrêng kong pơlê Dak Lak tơkŭm po Hneăng hôp tối tơbleăng tơdroăng pêi pro kơjo kum vâi hdrêng hơnăm 2022 ƀă tơbleăng pêi pro kơjo kum ăm vâi hdrêng hơnăm 2023. Hơnăm 2022, Liăn ‘măn kơdĭng kum vâi hdrêng kong pơlê Dak Lak hiăng mơhnhôk vâ chê 8 rơtal liăn, kum ăm lối 9.000 ngế vâi hdrêng. Mâu tơdroăng tŏng kum: Kum rak ngăn ivá ƀă trếo kơhiâm ăm tơdrêng, môi tia:h tơdroăng khăm rah vâ ‘nâi hdrêng ki krĭn ƀă pâ pơlât drêng vâi ‘nĕng châi plâi nuih sap kot mâ, khăm pơlât mâu ngế ki châi ‘na mâ ƀă ăm pơkeăng tê kơtê, tơdroăng kơjo kum Hnê hriâm môi tiah mơjiâng veăng hriâm ƀă ăm tơmeăm xúa tung hriâm, xah hêi ăm hok tro kơpong hơngế hơngo, diâp hnoăng liăn ăm vâi hdrêng ki kơtiê xơpá mơ-eăm tung hriâm, hbru rơxế mái ƀă tơmeăm xúa tung hriâm ăm hok tro.

Tơdroăng kring vế vâi hdrêng mê cho: kum ăm hdrêng ki trâm xía vâ, klâk têa, ki tro nôu pâ vâi tôu pâm, hdrêng ki ai tơdroăng pá pơlât prêi, vâi hdrêng kuăn tê ôh tá ai nôu pâ, kum ăm vâi hdrêng ki ai nôu pâ hiăng hlâ xua tro pơreăng COVID-19 ƀă pro hngêi tuăn pâ ăm vâi hdrêng ki kơtiê xơpá, vâi hdrêng kuăn tê.

Rôh kố, Kăn hnê ngăn kong pơlê Dak Lak pơkâ thế rêm râ, mâu kơvâ cheăng, tíu pêi cheăng tơdjâk troh kal pơtối rơtế ƀă Khu rak liăn kum mâu vâi hdrêng vâ tơdjêp, tơbleăng mâu tơdroăng tơkêa bro, mâu khu tŏng kum, mâu khu cheăng pa kong Chinh phuh vâ mơdêk tăng xiâm tŏng kum ăm vâi hdrêng.