Kơxê lơ 23/3, pôa Nguyễn Kim Sơn, Ngế xiâm ngăn hnê hriâm ƀă hnê mơjiâng tuăn ngoâ rơkê rơtế ƀă khu ki pêi dêi hnoăng cheăng hiăng ai rôh pêi cheăng ƀă kăn pơkuâ kong pơlê Dak Lak ‘na hnoăng cheăng hnê hriâm ƀă hnê cheăng pêi. Pôa Nguyễn Kim Sơn, ngế xiâm ngăn hnê hriâm ƀă hnê mơjiâng tuăn ngoâ rơkê pơkâ thế: Kơvâ hnê hriâm ƀă hnê mơjiâng tuăn ngoâ rơkê kong pơlê Dak Lak pơtối hơ’lêh nếo tơdroăng ki hnê, mơdêk ki rơkê ăm mâu khu ki hnê pêi pro châ tơdroăng ki rơhêng tung tơdroăng hnê phôh thong 2018, tơ’mot hơ’lêh mâu kơxô̆ liăn ing pơlê pơla vâ kuăn pơlê tơdjuôm ivá ƀă kơvâ ngăn hnê hriâm ƀă hnê mơjâng tuăn ngoâ rơkê kong pơlê tung tơdroăng ki ối xơpá nôkố, pêi pro pơlê pơla hriâm tâp vâ mơdêk ki rơkê ‘na tuăn ngoâ kuăn pơlê.

Tung mê, kong pơlê Dak Lak tơmâng ngăn tâ nếo troh mâu vâi o hdroâng kuăn ngo, mơdêk tơdroăng ki hnê hriâm hdroâng kuăn ngo, pro ivá tơdâng tơ’mô tung tơdroăng ki hnê hriâm. Nôkố ai hên tơdroăng tŏng kum kuăn muăn hdroâng kuăn ngo lăm hriâm. Kong pơlê kal tơkŭm mơdêk ivá hnê nâl Xuăn ăm vâi hdrêng hdroâng kuăn ngo.