Hâi lơ 17/1, Khu hnê mơhno tŏng kum Têt Quý Mão hơnăm 2023 kong pơlê Dak Lak (Khu hnê mơhno 1017) hiăng pơkâ tơ’nôm 600 rơtuh liăn vâ rak ngăn Têt ăm mâu rơpŏng ai hnoăng tơnêi têa, mâu ngế tro trếo ‘mêi da cam ƀă mâu ngế ki ê dêi kong pơlê. Tiô pôa Y Biêr Niê, Kăn phŏ pơkuâ hnê ngăn cheăng Đảng, Kăn pơkuâ Khu hnê mơhno 1017 kong pơlê Dak Lak, tơdroăng châ tơƀrê séa ngăn nếo má môi ăm ‘nâi, lâp kong pơlê xuân u ối lối 11.300 rơpŏng kơtiê ƀă vâ chê kơtiê tá hâi châ tơdah tơdroăng tŏng kum Têt ing khu râ kăn pơkuâ mâu râ.

Xiâm kối cho xua pơkâ kơtiê, vâ chê kơtiê pơ’lêh xua mê kơxô̆ rơpŏng kơtiê, vâ chê kơtiê dêi kong pơlê tâk hên tâng pơchông ƀă hơnăm hdrối, tơdrêng amê liăn ngân ôh tá pơ’lêh. Vâ tơniăn ôh tá lôi kơbố parŏng klêi roh Têt Quý Mão 2023, Khu pơkuâ cheăng Đảng kong pơlê Dak Lak hiăng môi tuăn pơkâ xing xoăng kơxô̆ liăn ki u ối nếo ƀă lối 600 rơtuh liăn ăm mâu tơring pá puât vâ tŏng kum mâu rơpŏng kơtiê, vâ chê kơtiê. Tơdrêng amê pơkâ mâu kong pơlê, khu cheăng, kơvâ cheăng thăm mơhnhôk kơxô̆ liăn pơlê pơla.