Hâi lơ 17/3, Vi ƀan Măt trâ̆n tơnêi têa Việt Nam kong pơlê Dak Lak tơkŭm po hneăng hôp hnê tối tơdroăng tung hlá mơ-éa Luât tơnêi (‘mâi hơ’lêh). Hên ngế veăng hnê tối tơdjâk troh mâu tơdroăng ‘na pơkâ hdró, pơkâ xúa tơnêi, luât pơkâ chêl thiăn kơjo kum pơtối pro pơlê nếo, tơdroăng tơleăng mơnhên tơnêi ki ai xiâm ing tơnêi pêi chiâk, tơnêi kong hiăng châ tối tơbleăng.

Pôa Võ Tấn Tài, Kăn ngăn khu tơrŭm dêi kong pơlê Dak Lak tối, mâu pơkâ pơ’lêh nếo tung hlá mơ-éa luât tơnêi (‘mâi hơ’lêh) kô pro môi tuăn, tơdâng tơniăn ki pơxúa tung pơkâ  xúa tơnêi. Krê ƀă kơpong Tây Nguyên, kơpong tơnêi ai hên hdroâng kuăn ngo rêh ối, pơkâ kal tơniăn tơtro ƀă tơdroăng rêh ối dêi kuăn pơlê tung tơdroăng cheăng tê mơdró. Veăng hnê ‘na luât chêl thiăn, kơjo kum, ‘mâi pro pơlê nếo, mâu kăn tối tiah kố kal pro nhên tâ mâu pơkâ tung tơdroăng chêl thiăn kơjo kum pro pơlê nếo klêi tơnêi têa xo tơvêh tơnêi tơniăn tiô tơdroăng rêh ối  tơ’mô lơ hôm tâ a tíu ton.