Hâi lơ 1/3, Khu pơkuâ droh rơtăm hneăng hdrối nah djâ troăng ahdrối kong pơlê Dak Lak tơkŭm po Hneăng hôp kăn teăng mâ roh má 4, hneăng hơnăm 2022 – 2027. Hneăng cheăng hiăng hluâ, Khu pơkuâ droh rơtăm hneăng hdrối nah djâ troăng ahdrối tung mâu tơdroăng cheăng mâu râ kong pơlê Dak Lak hiăng thăm pêi pro rơdêi tơdroăng cheăng xua tuăn pâ khu pú.

Tung 5 hơnăm hiăng mơhnhôk châ lối 9 rơtal 200 rơtuh liăn. Ing kơxô̆ liăn kố hiăng kum mơjiâng nếo ƀă rơnêu vâ chê 140 toăng hngêi tuăn pâ, diâp 171 phĭu kơdĭng liăn, diâp rơpâu kơxuô tơmeăm ăm khu pú ai tơdroăng rêh ối pá puât. Droh rơtăm hneăng hdrối nah djâ troăng ahdrối tung mâu tơdroăng pêi cheăng dêi kong pơlê veăng tơlo liăn mơjiâng liăn Tuăn pâ Khu pú a pơlê pơla ƀă kơxô̆ liăn rơlối lối 4 rơtal 300 rơtuh liăn, tŏng kum ăm hên rơpŏng droh rơtăm hneăng hdrối nah djâ troăng ahdrối ai kơxô̆ liăn pêi cheăng kâ, hluăn ing kơtiê krá tơniăn.

Tung hneăng nếo, tơdroăng pêi cheăng dêi Khu pơtối tơkŭm tung tŏng kum troăng hơlâ ăm droh rơtăm hneăng hdrối djâ troăng ahdrối, thăm pêi pro rơdêi ƀă mơdêk châ tơƀrê tơdroăng droh rơtăm hneăng hdrối nah djâ troăng ahdrối pêi cheăng kâ rơkê ƀă tơdroăng xua tuăn pâ khu pú – rêm ngế pêi hên tơdroăng lĕm tro.