Vâ pêi tơdroăng pơkâ troh hơnăm 2025, lối 90% ngế sap ing 15 hơnăm tơngi klêng ‘nâi pơchuât, ‘nâi chêh ‘nâl Xuăn, kong pơlê Gia Lai dế tơbleăng tơdâng tơ’mô mâu troăng hơlâ, tung mê ai tơdroăng ki hnê pơchuât ƀă chêh chư ăm kuăn pơlê kơpong hdroâng kuăn ngo, kơpong kuăn pơlê châ vâ chê tơdế pơ’leăng mơngế tung lâp kong pơlê.

Tiô túa pơkâ pêi pro Tơdroăng pơkâ tơnêi têa mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo hneăng má I (2021 – 2025) kong pơle Gia Lai tơkŭm po 735 to lâm hnê pơchuât – chêh chư ăm vâ chê 23.500 ngế a 175 to cheăm. Krê tung hơnăm kố, Khu ngăn hnê hriâm ƀă mơjiâng tuăn ngoâ rơkê kong pơlê Gia Lai kô tơrŭm ƀă Khu ngăn hdroâng kuăn ngo ƀă mâu tíu pêi cheăng ki ai tơdjâk troh vâ tí tăng ‘nâi plĕng ăm Vi ƀan hnê ngăn kong pơlê xing xoăng liăn ăm cheăm, tơring vâ po 217 to lâm hnê ăm lối 6.500 ngế.

Khu ngăn ‘na hnê hriâm ƀă hnê mơjiâng tuăn ngoâ rơkê kong pơlê Gia Lai, ăm ‘nâi: Kố cho tơdroăng ki pro pơxúa ăm kuăn pơlê hdroâng kuăn ngo tối tơdjuôm ƀă Gia Lai tối krê châ mơdêk ki rơkê ‘na tuăn ngoâ kuăn pơlê ing mê hluăn ing kơtiê, mơdêk tơdroăng ki rơkê tung rêh ối dêi tơná.