Tung 2 hâi lơ 22 – 23/4, a pơlê kong kơdrâm Ƀuôn Ma Thuột, kong pơlê Dak Lak hiăng tơkŭm po tơdroăng “Hâi leh hok tro 3 lĕm’’ râ Tơnêi têa hơnăm 2023. Hâi leh tơkŭm po ƀă hên tơdroăng ki má môi môi tiah: roh tơ’noăng pro pôa hơkôp tơkŭm xah hêi; tơdroăng hnê cheăng pêi; mâu tơdroăng xah hêi trâm mâ dêi pó, tơpui tơno rơtế ƀă ngế ki hâk vâ, diâp hnoăng liăn hriâm rơkê ăm hok tro tơkâ hluâ pá puât hriâm rơkê ƀă “hok tro 3 lĕm”.

Lối 1.500 ngế hok tro a mâu hngêi trung râ má pái phoh thong a pơlê kong kơdrâm Ƀuôn Ma Thuột hiăng ai roh trâm mâ tơpui tơno ƀă dêi pó. “Hok tro 3 lĕm’’ (mê cho hiâm mơno lĕm, hriâm tâp lĕm, ivá mo sêi lĕm) cho tơdroăng ki xiâm tung tơdroăng pêi cheăng Đoân Droh rơtăm ƀă tơdroăng pêi cheăng dêi droh rơtăm khô̆i THPT.

Ing tơdroăng kố vâ châ hlo, pơtâng tối ƀă po rơdâ mâu ngế ki djâ troăng ahdrối hok tro ki má môi châ inâi rơkê “Hok tro 3 lĕm’’, mơjiâng xiâm kối ăm hok tro châ achê tơdroăng ‘’Sinh viên 5 lĕm’’, “Hok tro 3 tơdroăng pơtâp’’ a mâu râ hnê mơjiâng a ‘ngêi tâ. Tung hơnăm kố, Khu xiâm pơkuâ Đoân Droh rơtăm tơrŭm rơtế mâu tíu cheăng pêi pro Hâi leh “Hok tro 3 lĕm” a 10 kong pơlê, pơlê kong kơdrâm tung lâp tơnêi têa.